KvK: no ta pro ni contra di niun partido politico

Ayera tardi, Camara di Comercio di Aruba  (KvK) a tene un conferencia di prensa hunto cu e lidernan di cuater di e shete partidonan cu lo participa den nan debate politico di diahuebs awor. Presidente di KvK, Ernst Mohamed a declara cu tur cos ta cla pa e debate.  Mientras cu e directora di KvK,  Sonja Velthuizen y algun miembro di directiva a splica na cada lider politico presente e logistica of dinamica di e debate aki.

E lidernan politico presente tabata Holmo Henriquez di MAS;  Benny Nisbet di PPA;  Ricardo Croes di RED y Candelario “Booshi” Wever di UPP. Presidente di KvK a informa cu tanto e lidernan politico di AVP,  Mike Eman y di MEP, Evelyn Wever- Croes a disculpa nan mes. Mientras cu e lider di POR, Otmar Oduber tabata pasando un momento tristo, ya cu un famia di dje a fayece na Hulanda, pa cual motibo e no tabata presente. Cada un di e lidernan politico aki lo representa nan respective partido den e debate cu lo tuma luga pa 7or anochi den e ballroom di Marriott Hotel. Durante e conferencia aki cada lider politico a trece brevemente nan punto di bista tocante  nan expectativa riba e debate aki; y kico nan kier trece dilanti den nomber di nan partido.

ABO y CURPA no ta participa
Presidente di KvK a laga sa cu e debate lo wordo transmiti live via TeleAruba, ya cu e lo ta interesante pa comunidad por haya informacion riba e diferente puntonan di bista. Tur shete partido a confirma nan participacion. El a referi na e dos partido ABO y CURPA  cu no ta participa den e debate aki.

Sr. Mohamed a bisa cu KvK a invita e partido ABO, pero despues di varios intento e partido aki no a responde y consecuentemente a keda afo; ya cu KvK mester sigui cu nan programa. “Nos a sigui cu esnan cu si a  responde.”

El a laga sa cu partido CURPA tambe a haya invitacion, pero nunca nan a responde. Sinembargo cierto momento cu KvK tabata cla cu tur cos rond di e debate aki, nan a reacciona pero tabata laat, ya cu nan no por adapta nan  programa un biaha mas.

Imparcialidad
Di otro banda el a expresa cu e ta contento cu e grupo di Milenium tambe ta trahando pa organisa un debate y KvK ta encurasha esaki. Encuanto e critica di falta di democracia y imparcial cu un di e partidonan cu no ta participa  a haci den direccion di KvK, sr. Mohamed a indica cu no ta corecto ya cu e debate ta imparcial. “Esaki ta e unico modo cu KvK ta conoce. KvK no ta conoce niun parcialidad pa niun hende. Nos ta independiente.” El a agrega cu “KvK no ta pro ni contra di niun partido”; ya cu tur partido a haya e mesun invitacion pa participa den nan debate politico.

El a priminti un debate di nivel basa riba puntonan cu lo mustra cual partido lo por trece e miho solucion pa e proximo cuater aña. “Nos a haci esaki di mil amor. Nos a haci esaki como cu KvK semper ta para pa duna tur hende un bista di kico ta pasando.” Tambe el a argumenta cu KvK a bin cu e debate politico aki como cu den pasado nan a yega di organis’e cu bon calidad.

Trahamento di preguntanan
Tambe el a indica cu niun hende tin e preguntanan actualmente, ni e mes. KvK a instala un comision independiente di tur cos. Nan ta formulando e prome parti di e preguntanan. Tur hende por formula pregunta ainda via Facebook y e-mail riba e debate organisa pa KvK. E comision ta evalua nan, y nan ta tuma esunnan bon forma riba un topico specifico. Tambe den e sala di e debate, e publico tin oportunidad pa canalisa nan preguntanan.  P’esey el a sugeri pa tur hende ta bon prepara riba tur topico cu ta tumando luga den nos comunidad pa asina debati debidamente.

Encuanto e preguntanan cu e participantenan politico mester debati riba nan, sr. Mohamed a bisa cu lo bay tin tres ronda di pregunta. E ta hinca di e forma 2-2-3 unda nan ta tira lot pa cada ronda. Na cada ronda e participante ta haya nan preguntanan y nan ta contesta 2-2-3 pa asina nan tur ta haya un chens pa contesta nan. Tambe esunnan cu no ta riba stage kiermen cu nan ta na banda, nan lo por contesta e preguntanan via Facebook di TeleAruba.

El a anuncia cu tin ticket na benta ainda na un prijs special pa tur persona interesa. Pa  studiantenan cu kier asisti na e debate aki y e hendenan 60 plus, e balor  pa nan ta 70 florin, pero nan mester demostra esey. Si e hende no tin acceso pa paga e ticket nan por sigui e debate via TeleAruba y participa via Facebook den dje.

 

 

You May Also Like

Na Guarda Nos Costa tin dia cu detenido ta haya ‘un pan so’

ORANJESTAD— Fuentenan cu Human Rights Caribbean Foundation (HRC) a trece na atencion di Bon ...

Trampolin pa trabou: ‘Importante pa nos clientenan tin un bida casi normal’

ORANJESTAD – Recientemente, Bon Dia Aruba a tene un entrevista cu Lionel Rumnit di ...

STA ganado referendum Avsec

Diabierna ultimo den oranan di mainta a tuma luga un referendum di e trahadonan ...

CAFT refineria riesgo.jpg

CAFT: Analisis di riesgonan financiero di refineria ta cla otro siman

E maneho di gobierno pa drecha su financia publico primordialmente ta basa riba e ...