Hopi eventonan social cu ta wordo organisa por medio di fundacionnan/instancianan encarga cu asuntonan social pa brinda informacion, charla y conscientisacion riba diferente topico, casi semper ta bashi.

Esaki nos a compronde for di presidente di Fundacion pa Hende Muhe den Dificultad, Suzy Kock, cual ta un cos cu e ta bisa tur otro fundacion ta haya hopi falta di dje den comunidad.

“Bo ta organisa eventonan anto un man yen di hende ta atende. Pero despues cu algo pasa, tur hende ta asina liber pa critica riba rednan social”, e presidente ta expresa na Bon Dia.

Manera nos a yega di trece dilanti, e instancianan manera Slachtofferhulp, Departamento di Asuntonan Social, Fundacion pa Hende Muhe den Dificultad y mas partidonan a uni forsa y crea un Multidisciplinaire Preventie Team. Esaki cu e meta pa combati e fenomeno di violencia/abuso domestico riba nos isla. E trabao cu e Multidisciplinaire Preventie Team ta haci y lo sigui haci ta di suma importancia segun sra. Kock, pa stop violencia den famia, pasobra e ta afecta famia y nan famia un pa un.

Sra. Kock a haya algun critica aña pasa unda cu el a subraya cu ta tuma un sociedad pa por lanta muchanan, y ‘nos como sociedad a faya barbaramente ora cu nos a cuminsa sconde violencia domestico’. Sra. Kock: “Unabes nos keda keto nos tur a contribui. Y e silencio eynan bo ta expresa nan, y no solamente nos fundacion, pero tur otro fundacionnan social.”  Bo ta liber pa critica sea riba rednan social of otro manera, pero segun sra.Kock, bo mester mustra cu bo por miho anto sikiera atende e eventonan cu e fundacionnan ta organisa.

E eventonan den mayoria biaha ta gratis, nan ta pa informa comunidad riba locual ta necesario, con por acerca y ki ayudo bo tin acceso na dje. Por ehempel, ora cu algo pasa cu bo yiu y bo ta sospecha abuso sexual, ki ta e pasonan pa tuma. Ta eventonan cu ta wordo organisa cu amor pa hendenan cu no ta wordo paga pa haci e trabao aki. “Di bo parti como sociedad tuma e man cu ta wordo extendi na abo pa e fundacionnan cu ta duna esaki boluntariamente pa nos, tuma esaki y core cu esaki. Atende e eventonan aki, siña mas y bo no sa nunca, kisas abo mes por ta un boluntario di un di e fundacionnan”, sra. Kock ta haya.

Boluntario di aña hende homber
E ta asina remarcabel tambe por ehempel cu e Fundacion pa Hende Muhe den Dificultad, cargando e nomber aki, durante e boluntario di aña organisa door di CEDE Aruba, nan boluntario y runner-up tabata hende homber. “Un di e contribucionnan mas grandi di nos fundacion ta consisti den su gran mayoria di hende homber. Nos tin hende muhe boluntario, pero den gran mayoria esunnan cu ta sostene fundacion – cu no ta parti di e directiva cu si ta consisti completamente di hende muhe – nan ta actualmente hende homber cual nos ta aprecia esey masha hopi.”

Un di e co-fundadonan di e fundacion aki tabata hende homber y nan ta haya cu nan tin hopi pa gradici na hende homber, mirando tambe cu e asunto di violencia ta afecta nos tur.


Femenismo = igualdad
Otro punto importante biniendo hopi dilanti ultimamente ta e mal interpretacion di locual ta conoci awendia, manera feminismo. Cu feminismo ta un movemento/ideologia bogando pa derechonan  igual di ambos sexo y tur aspecto, pero tin hopi hende ta critica esaki, pasobra e ta crea odio contra hende homber.

“Feminismo tin di haber cu igualdad, that’s it. Den derechonan igual e no ta haci un diferencia. Pero mescos den religionnan y otro gruponan bo ta haya algun cu ta poco extremo. Bo no por bisa cu bo ta stima un banda y sembra odio y rabia contra otro sexo. Nos ta riba e mundo akinan hunto y mester por biba hunto cu respet pa nos derechonan.” Den nos Statuut ta para esaki segun sra. Kock ta sigui comenta, y toch te dia di awe na 2018 ainda nos tin cu papia riba igualdad, pasobra e no ta existi, esey ta jammer”, asina e ta conclui.