????????????????????????????????????
Camara di Comercio

Fin di siman cu a pasa, duana a pone trabou abou y varios instancianan a keda disgusta cu e acto aki. Asina tambe Camara di Comercio y Industria di Aruba (KvK) nan a expresa den un relato.

Den esaki nan ta papia di e convenio firma entre duana y gobierno anterior pa drenta na vigor dia 1 di januari e aña aki, no a wordo cumpli y esaki a crea un disgusto cerca Duana cu a expresa esaki via nan sindicato. Di banda di gobierno a sali e declaracion cu nan mester tempo pa por actualisa riba e tema. Segun KvK, e acto aki ta causando hopi problema pa henter comunidad.

Nan ta bisa cu nan por compronde nan disgusto, ‘pero ta sigur cu tin formanan mas aceptabel pa protesta sin mester di costa henter e pais miyones di benta perdi, productonan vegetal cu ta core risico di daña pa retraso y cu pueblo tin cu bira victima di no por ricibi su mercancianan procedente di exterior’.

KvK ta urgi e sindicato y lidernan laboral di duana pa nan tene mas responsabilidad den nan accionnan y corda kico ta e consecuencia. “No mester neglisha y core riesgo pa no permiti remedi y otro ekiponan medico di pasa via nos waf y aeropuerto. Escasez di remedinan special por costa bida di hende. Ta un prijs halto pa mester carga  y KvK sigur no ta para tras di esaki.” “Nos kier ilustra y ta spera cu e ta obvio cu e manera di protesta aki ta causa daño na nos comunidad y esaki ta algo cu ningun hende por hustifica y p’esey ta pidi consideracion pa e consecuencia cu e por crea.”

KvK a indica cu nan lo reuni cu e sindicato di duana y gobierno pa discuti e punto aki y asina haya claridad di nan banda y lo pone urgencia pa asina normalisa e situacion bek.