(Infobae) – Papel di WC lo por bolbe tin escasez, pero awo no ta pa coronavirus sino pa e crisis di e barconan cu a keda pega na Canal de Suez.

Walter Schalka, director general di empresa Brasilero di celulosa (polimero) Suzano SA, a bisa cu e empresa tabata lucha pa transporta e materia prima pa papel higienico memey di retrasonan.

Schalka tin e preocupacion cu problemanan di envio lo por bira pio, cu por causa importante interupcion den e comercio di pulpa cu por afecta suministro di papel higienico si e productornan no tin suficiente inventario.

Alrededor di 50 barco ta circula den e Canal de Suez tur dia, pero nan a keda blokia desde cu Ever Given registra na Taiwan a keda pega.

Diferente mashinnan a purba y haci e intento diahuebs ultimo pa libera e gigantesco barco di carga cu a keda pega na Canal de Suez, mientras cu por lo menos 185 embarcacion ta na espera di atravesa e via aki. Na medida cu e tempo ta pasa, ta aumenta e perdidanan den e sector naviero.

Ever Given ta un barco di e tamaño di un edificio rascacielo cu ta transporta carga entre Asia y Europa e cual a keda pega diamars ultimo na e via artificial cu ta separa Africa for di peninsula di Sinai y ta conecta Lama Mediteraneo cu Lama Cora. Ainda cu e ayudo di e marea, autoridadnan te ainda no por a move e barco di bandera Panameño y nan ta busca diferente manera innovador pa liber’e. E trabounan a wordo reanuda ayera mainta pero, te awor nan no a haya exito.

E barco cu a wordo construi na 2018, tin capacidad pa mas 20.000 container y ta wordo opera pa 25 persona, tur di nacionalidad Hindu.

Peter Berdowski, director di un ekipo di expertonan Hulandes cu a wordo contrata pa yuda den e operacion di rescate, a compara e barco “cu un bayena grandi” y a adverti cu lo por ta necesario descarga e containernan cu ta un riba otro di casi 30 meter di halto pa asina reduci e peso y haci cu e lo flota atrobe.

 

 

LEAVE A REPLY

Please enter your comment!
Please enter your name here