Rusia a firma un acuerdo pa entrega na shete pais Latino Americano un remedi antiviral aproba pa autoridadnan Rusio pa trata Covid-19, e fondo soberano a anuncia ayera dialuna.

Fondo di Inversion Directo Ruso (RDIF, sigla na Ingles) a bisa cu por lo menos 150.000 pakete di medicina conoci como Avifavir lo bay ta entrega na Argentina, Bolivia, Ecuador, El Salvador, Honduras, Paraguay y Uruguay. Tambe lo manda pa Sur Africa, RDIF a bisa den un comunicado.

E tecnologia pa elabora e medicina lo transferi pa e firma Boliviano Sigma Corp SRL pa su produccion na nivel nacional, RDIF a bisa den un comunicado.

Ministerio di Salud Ruso a otorga su aprobacion pa uso di e medicina aki den marco di un proceso special acelera na mei, den cual a reporta “un efectividad grandi” den e pruebanan clinico.

Avifavir a wordo desaroya na base di e favipiravir, un antiviral generico desaroya na Hapon cu a mustra su eficacia den un etapa trempan di e enfermedad, y ta wordo comercialisa na e pais Asiatico pa trata casonan severo di griep.

Avifavir ta e prome medicina antiviral pa trata Covid-19 cu a wordo inscribi pa Ministerio di Sanidad di Rusia despues di mustra un “efectividad grandi” durante e pruebanan clinico, Fondo Ruso di Inversionnan Directo a anuncia.

Segun e funcionario, e medicina aki a wordo desaroya y proba clinicamente “den tempo record”. E cual a bira e prome medicina na base di favipiravir – antiviral desaroya na Hapon – inscribi na nivel mundial. Favipiravir ta un antiviral generico, cu a mustra caba su eficiencia den un etapa trempan di enfermedad, y ta comercialisa na Hapon pa trata e casonan severo di grip.

 

LEAVE A REPLY

Please enter your comment!
Please enter your name here