E mortonan pa enfermedad cu e nobo coronavirus ta causa, diamars ultimo a supera mey miyon na Latino America y Caribe, un di e regionnan mas golpia pa pandemia, na unda e casonan a aumenta riba 15 miyon durante e celebracion di Pasco, segun cifranan di Reuters.
Entre Rio Grande y Cabo de Hornos, e contagio a aumenta desde mita di december y aworaki ta den e mas halto punto desde cu e crisis sanitario a cuminsa, cu mas di 80.000 pa dia di acuerdo cu un promedio di shete dia cu ta inclui un record di 115.043 caso dia 17 di december.
Desde e prome morto cu reporta na Ecuador na luna di maart, 500.634 persona a muri y 15,33 miyon a wordo contagia desde cu 26 di februari a notifica e prome caso na Brasil.
Casi 2.000 persona ta muri pa dia, segun promedio mobil pa siman, menos cu e 3.000 cu a fayece na mita di augustus, e aumento mas halto den dos luna.
Mas di un tercio di e mortonan a sosode na Brasil y mas di un cuarto na Mexico, pero na Colombia e fayecidonan a aumenta te yega na 200 pa dia, mientras cu na Chile e contagio ta den su pik desde juli.
Autoridadnan di Salud di e region a mustra nan preocupacion pa e impacto cu celebracionnan di Pasco y fin di aña lo por tin den sistema sanitario cu a wordo surpasa na mita di 2020, y ora e proceso di vacunacion a cuminsa un tiki slow na algun paisnan.
