Leerorkest Aruba a pone como 300 alumno riba pia, pa asina duna nan prome concierto cu nan instrumentonan orkestral. Recientemente, den e ultimo siman di scol, alumnonan di cinco scol piloto Colegio Laura Wernet Paskel, Prinses Amalia Basisschool, St. Paulus School, SOAZA y Graf von Zinzendorf a bini hunto pa toca, canta y baila yen di entusiasmo, expresando nan conocemento musical cu Leerorkest Aruba a brinda na nan. 

No solamente grupo di alumno a haya AMV cu ta Algemene Muziekvorming, pero pa varios, nan a haya e oportunidad unico pa keda introduci na instrumentonan manera violin, cello, trombone, trompet, clarinet, dwarsfluit. Diferente docente di musica na Aruba, bou auspicio di Leerorkest Aruba tabata duna les di un di e instrumentonan, un biaha pa siman. Pa motibo di e pandemia, e lesnan a tuma nan tempo, apesar cu Leerorkest Aruba a ricibi un cantidad di instrument como donacion for di Hulanda. Mester a warda esakinan y ta na Maart por a cuminsa cu e lesnan di instrumento.

Y asina mes, despues di apenas cuater luna di les di instrumento,  e alumnonan cu a haya e oportunidad pa cuminsa siña toca un instrumento, por a acompaña nan co-alumnonan mas hoben cu a canta cu hopi gana.

E tabata un momento unico na unda por a mira e alegria riba e caranan di no solamente e alumnonan, pero tambe e docentenan y di tur cu tabata presente. Un cabesante di scol, Eta Geerman di Laura Wernet Paskel por ehempel a expresa su emocion pa mira su muchanan forma un orkesta real y e impacto positivo cu musica y e esfuersonan di Leerorkest Aruba tabatin riba tur mucha cu ta atende e scol.

Es mas a mira un adelanto grandi den resultado escolar en general. “Alumno y docentenan, tur ta contento,” ta locual Geerman a expresa. “Y ta pa prome biaha cu asina hopi alumno di Colegio Laura Wernet Paskel a logra nan toets pa por bay Colegio Arubano. Nos tur ta hopi contento y orguyoso di esey.

E opinion di Geerman ta comparti pa tur na e otro scolnan cu ta participa den e proyecto piloto di Leerorkest Aruba. E ambicion di e fundacion ta pa denter di algun aña, tur alumno di scol na Aruba haya e oportunidad pa participa na e programa di musica y instrumento, cu ayudo di diferente docente di musica cu ta traha parttime cu Leerorkest Aruba, “pero ta duna 100 porciento di nan energia pa e muchanan,” segun Johnny Croes, lider artistico di Leerorkest Aruba.

Un aña pa Leerorkest Aruba

Staff di Direccion di Cultura tambe tabata presente pa por a experiencia e momentonan special aki y tur tabata inspira.  Mester bisa cu recientemente Stichting Muziekschool cu ta maneha Scol di Musica Rufo Wever a bay de acuerdo pa permiti Johnny Croes traha tempo completo pa Leerorkest pa e periodo di un aña. Direccion Cultura Aruba ta subsidia  e fundacion. Y awor Leerorkest Aruba a duna sr. Croes un mision mas grandi, esta pa dedica mas tempo posibel pa expande e programa di musica. Fundacion PANA a colabora cu Leerorkest Aruba y a percura cu Croes lo sigui haya su salario pa e aña cu e ta ausente di Scol di Musica Rufo Wever.

Ministerio di Husticia y Siguridad di Hulanda y Minister Lampe

Leerorkest Aruba a bira un realidad danki na sosten di Ministerio di Husticia y Siguridad di Hulanda cu intervencion di Director di Leerorkest Amsterdam Marco de Souza, kende tabata na Aruba recien pa firma convenionan cu mas scol cu kier participa na e programa educativo/musical.

Johnny Croes tabata sumamente feliz pa e prome conciertonan aki. Croes no solamente ta e persona cu a acerca Marco de Souza pa Aruba tambe haya un Leerorkest, e ta e motor tras di e programanan digital cu a bira hopi popular tambe. Coordinador organisatorio di Leerorkest Aruba Juliette van Romondt ta percura pa e organisacion y su envolvimento ta danki na e cooperacion di Minister di Enseñansa Rudy Lampe, kende for di principio a sostene e proyecto. Di su banda, Rotary Club of Aruba a percura pa tur mucha cu a participa den e programa a haya nan uniform.

Miembronan di directiva di Leerorkest Aruba, Presidente Grace Maduro, Secretario Janice Poeran, Tesorero Stanley Looman y miembro Dilma Arends Geerman tambe a presencia e conciertonan cu a enfatisa e balor di percura cu berdad musica ta pa tur mucha.

Aki por mira un par di potretnan di e conciertonan. Por bishita e website di Leerorkest Aruba https://leerorkestaruba.org/fotogalerij/  pa mas potret y tambe por download e potretnan desea.  Keda pediente pa e video di e concierto cu ta bay ta riba e website y riba pagina di Facebook di Leerorkest Aruba