E ‘gran sorpresa’ di ayera sin duda tabata e anuncio di e exigencia di gobierno Hulandes cu, pa por duna Aruba e siguiente parti di e ayudo financiero, lo mester bay di acuerdo cu e ley di Reino encuanto supervision financiero. Esey por parce asina pero realmente esaki tabata pendiente pa algun tempo caba.

Desde cu e fraccion mas grandi cu ta sostene gobierno aña pasa a bin riba e fabuloso idea pa ‘eclipse’ e supervision di Reino for di e ley local LAft y cu esaki a obliga gobierno Hulandes na referi e cambio di ley aki na e conocido ‘prullenbak’, de hecho nos a keda cu e ley aki den su forma original, sin un fecha cu ta indica futuro. Hunto cu e protocol di november 2018 ta maneha esaki como base pa e actual supervision di CAft. Esaki no lo gana ningun premio di beyeza, pero loke a haci realmente tabata na un manera masha practico realisa e supervision financiero en todo caso, sin preocupa mucho mas cu e intento ridiculo aki di ‘scapa’ di e supervision di gobierno di Reino.

Naturalmente esnan cu pa principio ta lamenta profundamente cu tin un supervision di Reino ta keda rechasa cualkier supervision di cualkier forma, pero tin entre nos hende cu tin un opinion mas equilibra. Y esey ta cu tin un motibo pa e supervision. Esey naturalmente ta basa riba e debe astronomico cu nos gobiernonan a logra acumula den 34 aña, cu a haci tambe cu e crisis actual, cu a cuminza den salud y a bira un problema economico gigantesco, a bin gara nos sin un cent preto na reserva, y cu varios fondo cu nos ta paga tur luna ‘out of pocket’ (AZV,AOV) na merced di esun cu por yuda nos cu e fondonan necesario. Esey ta haci cu, apenas cabando juni, ya caba e ayudo Hulandes a bira indispensable pa gran parti di Aruba cobra algo pa por mantene nan hogar.

Como agravante ta bin acerca e situacion na Merca, cu na e momento aki ta birando solamente mas grave, cu e perspectiva cu den e proximo lunanan nos tin poco probabilidad cu nos ta haya un fluho razonable di turista di e pais ey. Tambe e mercadonan secundario manera America Latino y Europa ta keda un posibilidad distante tambe. No ta nada straño anto cu na e momento aki, y nos a haci e pregunta ey na varios persona, ta dificil pa haya un persona cu ta tribi di bisa unda nos por ta para aki seis luna. Y como cu a corto plazo, y a largo plazo tampoco, no tin alternativa significante pa turismo, nos ta obliga di gara e ayudo cu nos por haya, y esey ta bin di Hulanda.

Awor, naturalmente e pregunta clave ta, si e cambio di e ley local ta haci tanto diferencia compara cu un ley di Reino pa e mesun supervision. Pa bisa berdad, practicamente e no ta haci diferencia. Si nos bay back den pasado, na aña 2015, tempo cu Hulanda a bisa “ta basta” y a bin Aruba pa scucha un ‘Si’ of un ‘Si’ di gobierno di e tempo ey, a bin e propuesta pa hinca e ley di Reino den un ley local. Naturalmente esaki no tabata e forma pa hacie, pero na e momento ey Hulanda, masha practico, a acepta e forma incorecto aki di pone derecho y obligacion di gobierno di Reino den un ley local. Gobierno y parlamento di Aruba a comparti e pragmatismo Hulandes y asina a traslada e contenido di e ley di Reino, vigente pa St Maarten y Curaçao, pa e ley local. Gobierno di Hulanda a mira e momento actual como esun adecuado pa hiba e contenido di e ley di supervision di Reino back na su cas… Asina tin tur tres isla bao di e mesun ley, algo cu semper nan a busca, pasobra nan gusta uniformidad y sin excepcion.

Nos lo bay tende un poco keho y lamento for di e filanan politico, ya cu pa nan e ta haci un diferencia. Sin embargo, pa pueblo e no ta haci ningun diferencia. Nos situacion ta keda mescos, den e sentido cu e tarea cu nos tin pa contribui di nos entrada individual na caha di gobierno pa den e proximo decadanan sali for di e abismo financiero aki, no ta cambia. Loke ta spera nos den e tempo nos dilanti, ta simplemente mas medida pa salba gobernacion, pa salba e fondonan clave ya menciona, den forma di mas medida fiscal, manera formula caba den e Nota di Reforma presenta siman pasa na gobierno Hulandes.

Sin embargo, pa hopi di nos ni esey ta e problema mas grandi. Esun mas grandi ta cu tin hopi hende cu no tin ni pa haci compra, y por lo tanto tampoco pa contribui na caha di gobierno. Nos tin un problema gigantesco den nos poblacion cu no por atende nan propio asunto pasobra nan no tin ningun entrada. Na e momento aki, nan interes ta bay prome cu tur cos. E politiconan local ta esnan cu ta perde den e asunto aki, pasobra ta nan hala ta keda corta. Pero finalmente, ta nos mes ta carga e peso grandi di e debenan cu tin.

LEAVE A REPLY

Please enter your comment!
Please enter your name here