casino, minister croes

Negoshi di casino ta pasando den un situacion di instabilidad locual tambe a crea un situacion di instabilidad laboral pa tur esnan cu ta traha den e sector aki. 

E situacion cu a sosode recientemente cu e trahadonan di Aura Casino situa den Barceló Hotel a bolbe bati bel cu algo mester wordo haci pa garantisa cu situacion asina no bolbe ripiti. Ta asina cu e operadonan a cera porta di casino abruptamente y aunke nan a paga bonus, nan no a para responsabel pa e grupo di 44 trahado cu a keda sin haya nan salario,  principalmente den temporada di Pasco y Aña Nobo.

Ley di casino 

Ayera Minister di Labor, sr. Paul Croes a declara cu na momento cu un compania den mundo di casino financieramente no ta bay bon, e ta haya cu dificilmente un ley por evita pa nan por cera. E mandatario a reconoce cu nan a yega di tende di cierto casino cu realmente tin incertidumbre kisas na caminda, pero nan no por verifica esey actualmente.

Minister Croes a bisa cu esaki ta forma parti di e dinamica di comercio mes, ya cu “ora un compania ta perdiendo placa automaticamente un ley no por evita pa nan cera”, el a bisa.

Esaki a sosode aparentemente na Aura Casino, unda pa motibo di debenan y otronan, no a logra di paga e trahadonan. E ta reconoce cu esaki no ta algo positivo specialmente cerando fin di aña. 

Loke nan por haci como gobierno ta purba di monitor e desaroyo di e casinonan. Nan a pidi na e Asociacion di Casino di Aruba pa duna gobierno e lista di e diferente casino cu ta operado, e cantidad di trahadonan di e sector aki, tanto masculino como femenino. Tambe e edad di esunnan cu ta trahando y tambe si tin un perspectiva si tin un caso similar cu lo bay bolbe sosode den otro casino.  

E ta haya cu di e forma aki como gobierno nan lo por prepara nan mes pa e situacion aki y trata di acomoda e trahadonan. 

Alocacion temporal di trahadonan  

Minister Croes a bisa cu pa medio di Abogado Figaroa di FTA,ta bay concipia  un contracto pa e personanan aki na momento cu nan tin un empleo na otro caminda cu e ta un contracto temporal te na momento cu e casino den Barceló hotel habri di nobo of no.

Nan ta den combersacion cu e doño di e hotel cu ta esun cu tin e permiso pa conforme cu e reglanan di e permiso, nan no por mantene e casino cera pa un tempo indefini sin mustra posibel reapertura na corto plaso. 

Gobierno no kier tampoco cu e trahadonan di Aura Casino no por tin un periodo di transicion pa asina nan no por yega na empleo. Ta asina cu na momento cu e casino ta conoce un operador nobo, e lo mester tuma primeramente tur e empleadonan cu tabata den servicio di e casino cu a caba di cera. Ta keda un opcion cerca di e mesun trahado pa scoge pa bay bek na e casino nobo den e hotel menciona caba. 

Tur cos ta mustra cu e casino lo habri bek. Minister Croes a keda di haci su trabou pa medio di DPL pa haya sa pa ki dia e casino lo ta habriendo su portanan bek. E ta un perspectiva pa e trahadonan cu ainda no a haya un empleo a lo menos temporario.

Ayera minister Croes a bisa cu e Aura casino a keda cu un debe basta atrasa cu e hotel. Di parti di gobierno hunto cu intermediacion di Mediador di Gobierno y sindicato (FTA) a sostene un reunion hunto cu diferente partidonan envolvi pa re ubica e trahadonan. 

Te fin di siman pasa di e 44 trahadonan cu a perde trabou a wordo acomoda mas tanto di e trahadonan aki temporalmente den otro casinonan, y 14 trahado a wordo acomoda caba. Y e resto di e trahadonan ta riba e lista di prioridad di e Departamento di Progreso Laboral (DPL) pa nan haya trabou pronto, segun e mandatario. El a bisa cu e apoyo cu nan ta dunando na e trahadonan ta uno temporal ya cu nan ta mara fiho na e compania encarga cu e permiso di e casino. 

   

LEAVE A REPLY

Please enter your comment!
Please enter your name here