Locual ta confirma pa Presidente di SMAC Randy Thiel, ta cu Tumba Contest lo tuma luga dia 23 di januari, riba fecha cu e final di Caiso & Soca 2016 tabata planifica. Otro festival di Caiso & Soca sinembargo no ta planifica ainda.
No tin nada den kalender ainda pa reemplasa e festival di Caiso & Soca y pa loke ta Smac mes, Sr. Thiel a bisa di no ta kere cu ta bin un otro ainda. E intencion prome tabata pa mira si por pone algo otro unda cu personanan cu ya a traha nan cantica por competi cu esaki. Como cu no tin otro actividad, logicamente ta crea buraconan den e kalender di carnaval pa motibo di e anochinan di pre final cu ya no tin mas. Como cu esakinan ta wordo teni den siman, e presidente a bisa cu e no ta kere cu nan ta haci mucho diferencia.
Recap actividadnan carnavalesco
Sr. Thiel a describi e actividadnan cu a tuma luga diadomingo (parada di blaas y Calypso y Soca Contest Infantil y Hubenil) como un fin di siman exitoso. “Ambos tabata super y a bay hopi bon”. A bay 5 grupo di Parada di Blaas pero uno a uni na un otro cual a haci e total di gruponan 4, Haciendo cu e grupo a bira mas grandi. Esey tabata e grupo di NBO, Sr. Thiel a splica. Tabatin mas o menos 850 mucha cu a forma parti di e parada di blaas cual e ta contento cun’e. E parada a cuminsa un poco laat cual a haci cu a cuminsa cu e actividad di Calypso y Roadmarch tambe poco laat, e tin di haber cu e cantantenan tambe de bandanan musical cu tabata den e parada cu mester tabata presente na e contest. “Asina mes pa 7or di anochi a “sold out”, e ora mester a cuminsa improvisa carchi pa por a sigui bende. E actividad aki a caba 11or y mey di anochi, mientras cu tabatin permiso te cu 12or.” Sr. Thiel a agrega cu tur cos a cana bon unabes cu e contest a cuminsa, sin buraco den entre e cantamento di e participantenan.
E presidente di Smac a bisa si cu si ta sigui cu e idea di Calypso Contest net despues di e parada di blaas, y cu parada di blaas keda crece, lo mester hala e orario di e parada mas dilanti.
Diabierna awo lo tin actividad di eleccion di Reina Infantil cu Hubenil.
