Fase dos di coronavirus a cuminsa cobra mas bida na Mexico, te na e momento tin 8 morto registra, asina como 585 caso confirma di covid-19 na henter e pais.

E medidanan cu a cuminsa tuma na nivel nacional tin como consecuencia un crisis sin precedente den sector economico, politico, turistico entre otro. E destino turistico di Caribe Mexicano a prohibi e benta di bebidanan alcoholico y a coloca filtro sanitario accesibel pa e poblacion como medidanan contra e avance di coronavirus.

E medidanan a yega te na extremo di prohibi acceso pa turistanan, Mexicanonan of stranhero, na isla di Holbox, na estado di Quintana Roo, despues cu a registra e prome morto pa COVID-19 den e zona aki.

Secretaria Estatal di Siguridad Publico di Quintana Roo a ordena coloca un ‘reten sanitario’ riba e unico acceso na Chetumal unda ya tabatin un filter di siguridad, loke a provoca cu 26 di maart ultimo tabatin rijnan di autonan cu tabata purba di drenta e ciudad. “Esunnan cu no tin necesidad of no tin urgencia pa drenta of sali lo informa pa nan keda cas. Ta pa salud di tur hende”, Alberto Capella Ibarra, secretario estatal di Siguridad Publico a skirbi na Twitter.

Cancún, Chetumal, Cozumel y José María Morelos a anuncia caba cu nan tin restriccion pa circulacion di autonan den oranan di anochi, for di 10or no lo permiti hende keda riba caya. E medida aki tambe ta obedece pa un fase preventivo den materia di siguridad pa disminui hortamento y posibel sakeo di negoshinan y tiendanan di auto-servicio.