Presidente interino di Venezuela, Juan Guaido, a anuncia entrega di 20 miyon dollar proveniente di e cuentanan rescata di e gobierno interino na organismonan internacional y multilateral pa administra esaki y percura pa e ayudo yega na poblacion di e pais, pa combati efectonan di e actual crisis causa pa e coronavirus. Guaido a haci e anuncio via un mensahe riba rednan social.

Guaido a referi na “cuentanan rescata” cu su gobierno interino ta administra, sin duna detaye na cual cuentanan e ta referi. Entre otro ta trata di e cuentanan di e companianan liga na e consorcio di Citgo, cu tras decision di hues na Merca a keda blokea.

E ayudo segun Guaido lo permiti haya equipo di proteccion pa e profesionalnan di salud, pa colabora cu restablecimento di servicio di awa potable pa varios hospital y pa yuda cu producto manera gel antibacterial cu ta haci hopi falta.

E lider opositor a pone como condicion “irenunciable” cu e recursonan “no por pasa pa maneho di e “usurpador” (dictador Nicolas Maduro) ni di su complicenan pasobra, segun Guaido, Chavismo lo horta y extorsiona manera nan a haci “den ultimo añanan”.

Maduro a ricibi ayudo di China y Rusia pa enfrenta e coronavirus, pero esey no tabata suficiente. Guaido a referi tambe na e imposibilidad di e regimen di Maduro pa haya ayudo financiero di organismonan financiero internacional mientras tin un “dictadura corupto y narcotraficante na poder. Nos por haya ayudo pero Forza Arma mester kita e obstaculonan.”

El a anuncia e designacion di e diputadonan Carlos Berrizbeitia y Juan Pablo Guanipa pa coordina eventual ayudo internacional destina na combati e pandemia na e pais.

E regimen Chavista a ricibi te awor ayudo di China y Rusia, pero a solicita tambe un prestamo di 5.000 miyon di Fondo Monetario Internacional (IMF), cu nan no a haya.

 

LEAVE A REPLY

Please enter your comment!
Please enter your name here