Den su mensahe pa aña nobo ex prome minister y Lider di AVP mr. Mike Eman a enfoca riba e responsabilidad generacional di dirigentenan cu a nace for di e hecho cu AVP tin un base hopi special cu ta caracterisa su origen: AVP a nace for di un sentimento comun y profundo den e pueblo di Aruba; Un Causa Comun.  

 

“Cada generacion nobo di integrantenan di e partido ta realisa cu nan tin un yamada pa contempla riba e necesidad y aspiracionnan cu ta biba den comunidad y traduci esaki den un perspectiva nobo pa futuro, un Plan di Pais. Cada un den su tempo, enfrente di su realidadnan a acepta e reto, mision y destino aki. Nace den un cuna di sentimento comun a bay na caracterisa nos den curso di historia”, e di cuater generacion di lider di lider di AVP, mr. Mike Eman a expresa. 

Historicamente ora cu e Plan di Pais cu nos ta ofrece ta corela y conecta cu e necesidadnan di Pueblo nos ta wordo yama pa dirigi nos Pais.

Asina tur e liñanan invisibel di sentimentonan comparti den nos Pueblo ta forma un anhelo y un Causa Comun, ta crea e momentonan cu AVP y Pueblo ta comparti sentimentonan y ideanan pa cu e destino y mision di nos Pais.

 

Anhelonan y aspiracionnan estatal, retonan economico of social grandi, necesidad di reconocimento di nos identidad y fortifica e orguyo di ser Arubiano, compromiso fuerte cu equidad y husticia social, trato husto y igual pa un y tur, ofrece un perspectiva moderno y prometedor pa Aruba, tur ta idealnan y aspiracionnan cu cada un den su tempo a forma e esencia di e causa comun cu AVP a comparti cu Pueblo y Pueblo cu nos.

 

E compromiso aki a cana den linea di nos historia, for di e ideal pa nos ta Baas den nos mes cas, e emocion di e Lucha Arubiano, e nostalgia pa Ban Cas Bek, e vision pa rescata Aruba y crea un Aruba Nobo, e determinacion pa Cambio pa Miho, te na e transformacion di Aruba cu e vision y energia pa e Bon Trabao y e realisacion cu ainda falta.

 

P’esey nos tin un vinculo historico, profundo, transcendental y generacional cu e Pueblo di Aruba.

 

Awe atrobe e dolor ta tur caminda; di nos grandinan pa nos yiunan. E preocupacion ta general; di oposicion pa gremionan, sindicatonan y Banco Central. E gritonan ta bini di tur skina; e situacion ta urgente.

 

Awe na pia di un cero cu retonan grandi pa nos Pais nos t’ey hunto cu Boso pa lora manga un bes mas y traha duro pa saca nos comunidad for di depresion, pobresa y recesion y eleve bek cu optimismo y speranza nobo na un rumbo di felicidad y prosperidad comparti, cu un atencion special pa esunnan mas vulnerable den nos comunidad: Nos grandinan, nos muchanan, esunnan den soledad y nos enfermonan.

 

E lider di AVP, Mike Eman a reflexion riba e experiencia personal cu preocupacion cu salud di su señora Doina e dianan aki y con esaki a trece bek na momentonan cu a comparti y convivi cu su defunto mama den lucha pa su salud, y e reflexionan cu Bo ta haci na momentonan asina.

 

Pasando dia y oranan den e paseonan di nos hospital, compartiendo cu esunnan den lucha pa nan salud y nan famianan den ansiedad pa nan ser keri ta profundisa mi sentimentonan cu pa nos por haci un diferencia pa esunnan cu nos ta stima nos mester t’ey semper uno pa otro.

 

P’esey e a enfatisa cu causa comun cu nos mester yega hunto na dje pa nos Pueblo y nos Pais mester contempla riba e factornan di actualidad y futuro, riba e factornan economico financiero, tur cu e fuente di guia y inspiracion basa riba e balornan cu nos Creador a pone den nos curason: solidaridad cu nos semehante, responsabilidad comparti, equidad, compromiso cu e siguiente generacion, un sentido profundo di nos amor prohimo.

Den nos ideologia Cristian Democrata tin pensamento cu cu ta guia nos cu ta bisa na Hulandes: “Een mens komt pas tot z’n recht in relatie tot anderen”. Nos berdadero ser como humano ta bini padilanti y ta haya su significativo real den nos relacion uno pa cu otro”.

 

Mr. Mike Eman a finalisa su mensahe pa aña nobo cu un yamada na henter nos comunidad pa encontra otro atrobe riba e rumbo pa un causa comun nobo: “Laga nos drenta aña nobo carga cu e sentimentonan aki pa nos Pais, pa nos Pueblo, nos sernan keri y humanidad y cu guia y Bendicion di nos Creador y nos lo encontra otro atrobe riba e rumbo di un Causa Comun nobo. Hunto nos lo brasa e apelacion cu ta sali for di un plan coherente y un ekipo prepara cu por motiva nos imaginacion y determinacion pa pone nos Pueblo y Pais atrobe riba un rumbo di felicidad”.