Lider di fraccion di AVP, sr Marlon Sneek a mustra cu siman cu a pasa, minister Otmar Oduber a bay riba un radio tour pa trata di convence tur hende, cu e ta un minister c’un maneho transparente.

Algo cu partido AVP ta duda totalmente ya cu den su maneho, ningun caminda por reconoce e maneho transparente aki di e mandatario, cual e ta insisti di ta ehecutando den su decisionnan.

“Cada bes c’un hende bisa cu e minister aki ta transparente, ta bon pa tur hende sa di con e mes ta bisa cu e ta transparente y pakico e ta haci esaki.

Por mira un minister cu no ta ningun momento transparente y nos a yega di cuestiona su persona den pasado riba mesun tema aki, den caso di un compania cu ‘out of the blue’ a presenta un dia y ta haci excavacion den tur sorto di negoshi.

Awor nos a tuma nota cu nan ta bende incenerator tambe, pero ta trata di mesun compania cu ta amigo di e minister, e mesun compania cu por mira nan propaganda riba trailernan di carnaval.

Nos a cuestiona e minister riba e contract grandi cu e compania aki a haya pa core un par di pipa na Barcadera caminda ta dera sushi awor y e minister a sali hunga su wega, cana riba e luga caminda e compania ta cobando y awor nos ta mirando cu atrobe e mesun compania ta den wega.

E minister ta core bin tene un conferencia cu varios medio di comunicacion, hasta algun di Corsou tambe pa graba e reunion, pa asina bisa cu e ta transparente.

Ta bon pa splica con e cos aki a bay, ya cu nos a sigui e reunion aki via di nos Facebook page, y motibo cu nos a haci esaki via di Facebook ta pa motibo c’un peticion ta drenta parlamento pa minister bin parlamento.

E peticion aki ta drenta dia 3 di juni caminda tin cu bisa cu e preguntanan a ser publica den corant prome cu e minister a bin parlamento mes, pues ta preguntanan cu e minister hunto cu e parlamentario di POR aki a pidi pa haci den un vragenuur.

Dialuna atardi pa 3.45 ta drenta e peticion aki pa e reunion y ta yama e reunion pa diamars 4 di juni na careda anto aki por mira cu e reunion aki ta parti di un show di e minister.

E minister aki ta pretende di ta transparente y ora cu e yega parlamento caminda nos tin un structura e tin cu duna un lista di documentonan cu e tin cu presenta durante di e reunion cu e mes a solicita, esta e vragenuur.

Un vragenuur ta cu e persona cu a haci e preguntanan ta haya oportunidad pa lesa e preguntanan bek pa e minister, caminda e minister ta contesta e preguntanan y despues di esaki e otro miembronan di parlamento tin ‘un’ minuut pa haci pregunta.

E minister a cana yega, el a buta cuater lista di documentonan cu el a trece caminda riba lista 1 so, tin un total di 26 documento cu ta rapport, dossier, MB y lista 2 tin 10 documento, lista 3 tin 12 documento, lista 4 tin 12 documento pues en total tabatin riba e mesun 61 documento, pues un mesa yena cu documento.

Tur esaki pa un parlamentario bay pasa den esakinan prome cu e minister caba di contesta ya cu despues cu e caba di contesta, un parlamentario tin un 1 minuut pa haci pregunta.

Pues parlamentarionan tin cu bay wak con nan ta pasa den tur e 61 documentonan aki pa despues haci nan preguntanan na minister Oduber.

Esaki minister aki ta yama transparencia pero awor nos kier sa con transparente e ta, ya cu fraccion di AVP diaranson a haci un peticion na e minister Otmar Oduber pa e manda e 61 documentonan aki pa parlamento, pa asina parlamento realmente haya oportunidad di pasa den e documentonan, lesa y analisa esakinan pa despues haci pregunta na su persona. E ta un forma cla cu ta mustra cu minister Oduber tin cosnan di sconde den henter e proyecto aki, parlamentario Marlon Sneek a declara.

 

LEAVE A REPLY

Please enter your comment!
Please enter your name here