E decision di recorte di 60 miyon sin participacion di dunadonan di cuido lo conduci na reduccion di oferta di cuido na Aruba. Asina representantenan di e sector a bisa Parlamento di Aruba den un carta fecha 16 di December. Un carta cu apenas awor a bira conoci pa Parlamentarionan, particularmente di oposicion.

Pero e tabata obvio pa lider di MAS, drs. Marisol Lopez Tromp, cu otronan, entre otro e Director Adhunto di AZV ir. Edwin Jacobs, MSc, pero tambe Parlamentarionan di MEP tabata na altura di e carta. Y e ta condena e hecho cu no a comparti e carta prome ni e rapport di e gremio cu ta cla di Juni caba. Es mas, tabata pa e motibo ey mes cu e dunadonan di cuido a manda carta pa Parlamento, pasobra nan tambe a tuma nota cu Parlamento como organo legislativo no sa di nan rapport y e consehonan cu nan a duna Gobierno.

Carta

Den nan carta, e dunadonan di cuido ta bisa Parlamento cu tabata dia 21 di Januari 2021 a manda carta habri pa Parlamento y miembronan di Parlamento riba e recortenan den cuido. “Nos a bisa cu e recortenan aki lo conduci na reduccion di e oferta di cuido na Aruba. P’esey mes Gobierno a dicidi pa institui un comision nacional di cuido cu a duna su conseho amplio na Juni, riba con por reforma, mehora y crea espacio pa spaar den e sector di cuido, den e proximo añanan,” e carta a bisa.

Pero na e momentonan aki, ta mustra cu no a haci nada cu e pakete di conseho, segun e dunadonan di cuido. “Asina leu cu nos sa no a comparti e pakete di conseho cu Parlamento, mientras cu e ta parce relevante cu tin acceso na e informacion aki pa tuma decision.” Esey ta motibo pakico a manda e conseho pa Parlamento. “Sin e acercamento amplio proponi pa nos, ta indeseabel y hasta inetico si Organo Ehecutivo di AZV no ricibi e fondonan pa cumpli cu su obligacion di cuido, pero cu ta bolbe corta den presupuesto di cuido. E ta nifica cu hopi ciudadano lo no por haya acceso na cuido cu nan tin derecho riba dje.” E dunadonan di cuido ta bisa den nan carta cu e daño medico a termino corto y largo lo ta enorme.

Wardando for di Juni

For di Juni ta wardando un combersacion cu Organo Ehecutivo di AZV y Gobierno pa mehora y implementa e pakete di conseho. For di Hulanda a tuma paso cu a keda prepara for di januari caba den direccion di e reformanan desea., sosteni pa medio di un oferta pa paga un economista di cuido renombra, pa sostene e comision. E economista lo mester tabatin e encargo pa haci calculacionnan y unda mester, ahusta y adapta e plan. Gobierno a dicidi na April ultimo cu Aruba mes lo paga e experto pa evita cu e economista lo sinti su mes mas obliga pa afilia na interesnan di Hulanda.

“Pero te ainda Gobierno no a duna instruccion pa e trabou cu ta nifica cu a perde tempo valioso,” segun e sector di cuido den e carta na Parlamento. “Como sector di cuido nos tin miedo cu consecuencia di hala e decision aki pa busca e experto aki pa 2022 lo nifica cu ta pon’e un banda, ya cu no lo ta bay tin presupuesto p’e.” Consecuentemente e cuido obtenibel na 2022 lo ta mas abou cu na 2021, mientras cu e demanda lo ta mas halto, segun e carta.

“Ta na Gobierno pa determina e medionan cu pais Aruba ta pone disponible na AZV. Nos ta spera di y tin fe cu parlamento ta haci e escogencianan corecto. Y nos lo ta cla pa comparti pensamento y duna conseho.”

E carta ta firma pa representantenan di tur e asociacionnan cu ta considera dunadonan di cuido na Aruba, for di specialistanan te boticarionan, fisioterapistanan te laboratorionan priva.

Marisol Lopez Tromp

Hecho ta cu recientemente Director interino di AZV, Sr. Jacobs a bisa na Bon Dia Aruba cu e sector ta wak tur caminda, menos internamente pa baha gasto. Y aunke lider di MAS no kier bay contra e ponencia di ir. Jacobs, su conclusion ta cu “Director Interino di AZV por a haci comentario riba e rapport, pero como Parlamento no por a haci ningun proposicion, pasobra nos no a ni ricibi e rapport.

E ta cla di Mei, y durante e reunion publico di November, colega Parlamentario a puntra pa e rapport y Minister Oduber a bisa di lo haci’e, pero no a entrega e rapport.” Consecuentemente ta mira e carta, cu nan a dicidi pa mand’e pa Parlamento pasobra nan a ripara cu e Minister nunca a manda e rapport.

Falta di transparencia

“Mi punto di salida ta e procedura intransparente di e Minister, sabiendo cu ta e mes a crea un decreto Ministerial pe. Y manera mi por compronde, e Minister no a ni reuni cu e comision tampoco despues cu e rapport a keda cla. Awor pa bisa cu ta de acuerdo cu nan of no, ta cuestion a sinta na mesa cu nan,” Marisol Lopez Tromp a mustra, “pasobra ta asina por a yega na decision kico ta tuma di e rapport of no. No lubida cu nos como Parlamentario a y ta trata e topiconan aki di recorte, incluso e 60 miyon den AZV, y cua lo ta e miho forma pa haci’e. Hasta den e ultimo IPKO cu tabatin na Boneiro e tabata un topico. Hefe di e delegacion di Aruba, Sr. Rocco Tjon a hasta presenta e topico den su discurso. Pues e topico ta keda hunga un papel.”

Pues no por a keda sin manda e rapport pa Parlamento, irrespecto ken ta de acuerdo cune of no. “Sr. Jacobs por a duna su opinion pasobra el a lesa e rapport, pero nos di Parlamento, formalmente no a ricibie y no por duna opinion. Pa mi ta e procedura. Pasobra hasta si por tin sugerencia bon of no, mester a yega na areglonan structural cu e grupo.”

Tene rapport scondi

E lider di fraccion di MAS ta puntra su mes pakico Minister Oduber no kier a comparti e rapport formalmente cu Parlamento si e mes a institui e comision pa medio di un decreto ministerial. Tur e actornan a traha riba dje. Y particularmente ta MEP ta trece e topico dilanti cada biaha cu tin reunion, entre otro na IPKO. “Nan lo ta trece dilanti pasobra nan tin contacto cu e Minister y sa exactamente kico ta pasando? Pues nan ta trece nan opinion pero e ta hopi di un banda so, unda nan ta enfoca unicamente riba e 60 miyon di recorte, pero nada di contenido. Y e rapport aki ta di e veld. Si ta de acuerdo cune of no ta otro asunto.”

Hasta lo mester a discuti e rapport den Comision Fiho riba Cuido den Parlamento cu ta dirigi pa Arturo Vallejo. “E por a bin Parlamento y discutie eyden. Nos tur por a lesa e rapport y discuti e topico formalmente den e structura di Comision Fiho y por a invita cualkier actor cu Parlamento ta haya ta bon pa discuti cu nan, intercambia di idea. Pakico e ta importante ta pasobra mañan e Ministernan ta bin papia di e tipo di recortenan aki den Parlamento, pero nos no tin bista di e totalidad. Den e caso aki e rapport aki por duna bon bista riba kico cada sector ta pensa, kico e ta nifica den e problematica, cu hopi profesional ta bayendo afo of ta dicidi pa no traha mas na Aruba. Pues tin hopi aspecto di calidad, con ta recorta na unda, si ta berdad spaar y mas,” tabata e observacion di drs. Marisol Lopez Tromp.