Dialuna ultimo Gobierno di Aruba a duna un conferencia di prensa conhuntamente cu miembronan di Crisis Team pa loke tabata trata situacion di Covid-19 na Aruba, den esaki CEO di ATA Ronella Croes a papia tocante con variante nobo Omicron ta afecta sector di turismo.

El a bisa cu por nota cu na paisnan esaki ta hopi presente caba, con casonan positivo ta subi na unda cu esaki ta mara na grado halto di transmision di e variante aki.

Paisnan a cuminsa tuma medidanan di prevencion y pa gana tempo pa suministra e di tres vacuna bao e mayoria di e poblacion, paisnan tambe a cuminsa haci ahustacion pa cu maneho di entrada na nan pais na unda cu Aruba tambe a haci esaki.

Manera a keda conoci dia 29 di november nan a anuncia diferente cambionan den e maneho di entrada, for di 1 di december a prohibi entrada pa personanan procedente di South Africa, Soto, Swaziland, Namibia, Mozambique, Zimbawe y Botswana di biaha pa Aruba, e dia aki nan tambe a anuncia cu 4 di december Aruba a introduci un categoria nobo di clasifica paisnan cu diferente nivel, algun di nan cu nivel di riesgo hopi halto, te na e momentonan ey nan tabatin dos categoria como paisnan di nivel di riesgo abao y otro di paisnan cu nivel di riesgo halto.

Bao e categoria nobo di paisnan cu nivel di riesgo hopi halto Croes a menciona cu personanan mester haci e PCR un dia prome cu nan biahe y mester upload e resultado negativo riba e app.

E situacionnan di e paisnan ta wordo evalua cada dos siman door di DVG na unda e ora ey nan ta haci ahustacion di lista di e paisnan conforme e tres categoria menciona, pa esunnan interesa of cu tin mester di mas informacion di e lista por drenta den e website www.aruba.com

Pa esunnan cu ta biahando di Hulanda nan tin website special na Hulandes cu rekisitonan cu talbes ta un tiki mas importante segun Croes a sigura, pa biaheronan di Hulanda.

El a bisa cu ta importante pa ATA ta den dialogo cu otro autoridadnan a bin ta evalua e maneho di entrada pa Aruba pa cu paisnan cu ta den e nivel di riesgo hopi halto, el a splica cu nan ta haci esaki den anticipacion cu Merca lo wordo categorisa como un pais di riesgo hopi halto, den caso aki nan mester para keto kico esaki lo nifica pa cu impacto di fluho di bishitante y turistanan for di Merca.

“Den contexto aki, ta importante pa sigura cu e impacto aki no ta uno cu ta grandi di mas, esey ta netamente e motibo pakico nos a haci evaluacion aki y puntra nos mes si Merca wordo categorisa mañan como un pais di riesgo hopi halto, kico ta e disponibilidad di Mericanonan pa nan por haci e test den un dia y kico lo ta e impacto como tal”, Croes a señala.

Nan conhuntamente cu autoridadnan concerni a formula un cambio di maneho y cu esaki lo wordo presenta na otro instancianan si ta necesario, si lo ta e caso cu si, e ora ey nan lo anuncia e ahustacion di e maneho aki pa sigura cu nan tin uno cu ta stimula y keda stimula e biahenan for di Merca pero tambe cu nan ta keda mitiga e riesgo di importacion di e variantenan di Covid-19.

Esaki tambe lo por trece cambio di maneho pa otro paisnan conforme e categoria di riesgo di e pais, di otro banda, el a sigura cu Aruba so ta haci esaki y nan sa con esaki ta bay caba, diferente otro paisnan tambe ta ahusta nan maneho di entrada.

Asina mes, el a declara cu nan tambe ta preocupa pa e nivel di riesgo cu Aruba tin pa Merca cu ta e mercado principal na unda cu Aruba ta den e nivel di riesgo 3 pero e preocupacion ta cu por ta moviendo na un nivel di riesgo 4 na unda cu lo por nifica lo siguiente, CDC ta indica cu si personanan di Merca ta pensa di haci un biahe cu un pais cu tin un nivel di riesgo cuater nan no ta recomenda pa nan biaha, nan ta recomenda specialmente pa personanan evita di biaha eynan.

“Esaki ta loke nos kier purba di evita tambe, pa Aruba no yega back na unda nos tabata ta na nivel di riesgo cuater, ” Croes a declara.

Como autoridadnan concerni, Croes a expresa cu nan ta den contacto continuo cu CDC durante henter pandemia y lo sigui mantene esey, di mesun manera el a sigura cu si tin mas cosnan positivo na Aruba, mas paisnan lo duna conseho di no pa biaha pa Aruba loke ta nifica menos turista.

Un parti integral di e maneho actual di Aruba ta pa mas lihe cu ta posibel y mas hende cu ta posibel lo mester haya nan di tres vacuna, pa esunnan cu no ta vacuna nan mester vacuna lo mas pronto posibel na unda cu e proteccion aki ta limita e uso di Unidad di Cuido Intensivo (ICU) na hospital, di otro banda Croes a señala cu nan ta consciente cu Aruba ta den porta di dianan di fiesta y cu e contagio lo por acelera durante e dianan aki.

“Nos ta haci fiesta awor y carga e consecuencianan negativo na januari y durante e lunanan cu ta sigui of nos ta mitiga awor y sigura cu nos por sigui proteha nos recuperacion economico y nos temporada halto di turismo mas tanto posibel, eseynan ta e preguntanan clave cu ta riba mente di hopi y nos ta comparti tambe e pensamentonan aki, pasobra e ta algo cu ta sigur riba agenda di ATA y tambe di autoridadnan concerni”, Croes a bisa.

El a enfatisa cu e maneho actual ta wordo revisa na tur momento, incluso awor, no obstante, cu dialuna ultimo nan no a anuncia cambionan, e maneho actual ta wordo evalua continuamente y lo ahusta esey si tin mester, e situacion ta sigui keda uno cambiante y ta discuti si mester ahusta por ehemplo, maneho pa cu celebracionnan cu ta na caminda.

Nan ta hopi consciente cu den sector comercial tin hopi diferencia di opinion y pensamentonan comun pero tambe tin hopi diferente discusion di kico si mester of no mester haci, el a sigura cu tur ta wordo tuma na cuenta mas tanto cu ta posibel y ta wordo evalua debidamente, algun gremionan y comercionan kier flexibilisacion y tin otronan cu kier mas medida ainda, el a finalisa.