“E situacion ta uno sumamente serio”, asina lider di AVP, e partido mas grandi di Aruba, Mike Eman a bisa durante un rueda di prensa riba e carta cu Gabinete Wever-Croes a manda Hulanda. Den e carta ta notifica gobierno Hulandes cu e ley di LAFt cu a pasa den Parlamento algun luna pasa, no ta bay wordo ehecuta.

Awe e reunion di Conseho di Reino ta tuma luga na Hulanda, unda tin masha hopi speculacion cu lo bin cu un Koninklijk Besluit, pa motibo cu e actual gobierno no ta cumpliendo cu e protocol firma door di Prome Minister Wever-Croes y Minister Maduro di Finanzas.

Eman: “Den e protocol gobierno a priminti Hulanda cu lo bin cu un CAFt nobo, den cual ta regla e podernan cu RMR (RijksMinisteraad) tin pa loke ta finanzas publico di Aruba. Na momento cu e ley a bay Parlamento, miembronan di Parlamento cu ta sostene e gobierno aki a cambia e ley di tal forma cu tur e podernan cu RMR tabatin pa ta parti di e vigilancia riba Finanzas Publico di Aruba, a wordo saca for di e ley cu permiso di e propio gobierno, cu tabata presente den Parlamento na e momento ey. Riba un pregunta specifico di miembro di Parlamento, Richard Arends, gobierno a notifica kico ta e posicion di gobierno pa loke ta e amienda cu a entrega y aproba. Gobierno a bisa cu e mes tabatin gana di cambia e ley den cuadro di e amienda manera el a wordo presenta.”

Asina ta cu e cambionan den e ley tabatin aprobacion di gobierno. P’esey ta straño, segun Eman, cu awe nan a haya tende cu gobierno ta manda Parlamento un carta, caminda gobierno despues di tres luna ta manda bisa cu un ley cu nan a pasa lo no wordo ehecuta door di gobierno.

Eman ta haya henter e situacion aki uno masha preocupante mes. “Normalmente, aunke ta berdad cu ultimo tempo nos ta bibando den hopi cos cu no ta normal den nos pais, nos leynan y custumbernan constitucional ta bisa cu awe no por tin gobierno mas, basa riba e hecho cu un gobierno ta bay contra di un ley cu a pasa y ta aproba door di Parlamento”. Literatura ta mustra cu semper cu tin un conflicto entre Parlamento y gobierno, e base di salida ta esun di e ‘vertrouwensregel’.

“De vertrouwensregel houdt in dat een minister, staatssecretaris of het kabinet als geheel moet aftreden als zij niet langer het vertrouwen genieten van het parlement.
Bij een conflict tussen regering en parlement heeft de regering ook de mogelijkheid niet af te treden, maar het parlement te ontbinden en nieuwe verkiezingen uit te schrijven, in de hoop dat de nieuw gekozen Parlement het kabinet of de minister wel het vertrouwen geeft.”

Gobierno cu tabata presente durante tratamento di e amienda a bay di acuerdo, creando asina e expectativa cu e ta bay ehecuta e cambionan den e ley. Eman a bisa cu e conoce sr. Thijsen hopi bon y pa diferencianan di opinion cu e por tabatin cune, e sa cu riba e punto di autonomia y di reparticion di podernan y estado di derecho e semper ta pone e posicion pa loke ta nos estado di derecho hopi dilanti den tur su presentacionnan. “”Pa mi ta hopi interesante pa sa con un persona asina cu a cambia un ley pa asina cambia influencia di gobierno Hulandes den finanzas publico di pais Aruba, lo acepta cu cuarto pa diesdos, gobierno sin wink’ ta bisa di no ta bay ehecuta un ley cu mayoria di Parlamento a pasa.”

“Awe nos tin un gobierno cu a gaña Parlamento, pais Aruba y comunidad di Aruba cu nan a cambia un ley pa supuestamente salvaguardia autonomia di pais Aruba y awe a coy e ley y a tir’e den prullenbak. Algo constitucionalmente inaceptabel. Nos ta pidi comunidad, gremio, institutonan y tur cu mester salvaguardia estado di derecho di nos pais pa nos keda vigila per minuut kico ta bay pasa na e momentonan aki, pasobra segun e reglanan constitucional awe nochi nos no tin un gobierno cu tin un base di sosten den Parlamento di Aruba. Esaki pasobra gobierno a manda bisa Parlamento cu e no ta bay ehecuta un ley asina crucial cu Parlamento a pasa den presencia di gobernantenan di e actual gobierno.”

Conseho di Gobierno di Reino a haya e carta di diaranson caba den cual Gabinete Wever-Croes a notifica nan cu nan no ta bay ehecuta e ley di CAFt (LAFt). Cerca nan tambe un luz mester a cende cu democracia di Aruba ta coriendo peliger cu e ultimo desaroyonan aki.