Diaranson mainta, dia 18 di september, e proyecto ‘Good to Great’ pa hobennan di scolnan secundario a bay di bishita na Hilton Hotel. E Proyecto ‘Good to Great’ ta dirigi pa hobennan haya sa kico ta rekeri pa ta un profesional y asina na un edad jong enfoca riba cua carera nan kier scoge pa nan futuro. E biaha aki a toca turno un biaha mas na e studiantenan di Abraham de Veer School. 

E Proyecto ‘Good to Great’ ta hopi bon hinca den otro y sigur ta yuda  amplia e conocemento di nos studiantenan encuanto e posibel profesionnan cu nan por bay studia p’e y ki ta e posibilidad pa trabou cu tin aki na Aruba. E proyecto ta financia pa Gabinete Wever-Croes y ta keda dirigi pa señor Jalken Antonia y señora Terry Gumbs.

E proyecto a cuminsa aña pasa y e biaha aki e studiantenan di Abraham de Veer School a haya splicacion amplio di kico tur ta e trabounan cu ta tuma luga na Hilton Hotel. Profesionalnan di diferente Departamento di Hilton Hotel a sinta cu e studiantenan pa duna nan splicacion over di nan trabou diario den Hilton Hotel, kico ta nan vision, mision y balornan. Alabes nan a enfoca riba nan carera profesional y a contesta tur pregunta cu e studiantenan tabatin.

Tromp-Lee durante e mainta aki a hiba un discurso cortico na e studiantenan caminda entre otro el a enfatisa cu den bida tur cos ta posibel, cu nan mester tribi pa soña, pero na mes momento nan mester realisa cu nada ta bin cay for di cielo y cu nan mester traha duro pa haci tur nan soñonan bira realidad.

Alabes a haci uzo di e oportunidad pa felicita e coordinadornan di proyecto y a gradici Abraham de Veer School y Hilton Hotel y su trahadonan pa a acepta pa participa na e proyecto aki. Sigur un proyecto cu ta dirigi na bienestar y progreso di cada studiante y cu a largo plaso lo beneficia Aruba tambe.

Na final di e programa, loke mas a resalta ta cu e studiantenan a expresa cu  nan a siña for di e mainta na Hilton Hotel cu nan mester traha duro pa por progresa y a siña cu den un hotel tin diferente tipo di trabou cu por keda eherce. Mayoria di studiante a indica cu nan a siña cu tanten bo ta dispuesto pa duna mas di bo mes bo por yega hopi leu den e hotel. Sigur nan a cera conoci cu personanan cu por bira un role model pa nan y un fuente di inspiracion.