Aki un paar di dia pueblo di Aruba ta bai urna electoral pa asina escohe su parlamentarionan. Importante ta pa pueblo cu ta desea un cambio vota pa e cambio. Solamente si pueblo vota differente nos lo tin un resultado differente.

Politica tradicional tin nos awe unda nos ta. For di 2001 bin ariba ta unda cu mas danjo a wordo hasi na e parti financiero di nos isla di Aruba. Gobierno a hasi uso di buraco den leynan y a bai ariba mercado internacional pa asina fia placa y hinca nos isla den un debe financiero. Asina a cuminsa crea debe riba debe te na unda nos ta awe. E debe a wordo crea pa 2 partido y eseynan ta geel y berde. Den ultimo 4 anja nos debe a subi di 4.2 biyon florin pa 6 biyon florin. Tin ta bisa cu e debe nacional ta mas cu 6 biyon.

Na 2017 nos a tende hopi promesanan cu lo goberna sin medidia y si no tin 7 minister lo no tin gobierno. Despues di a manipula nos pueblo a forma un gobierno y e unico cos cu nan a crea ta debe y biaha rond mundo sin ningun resultado. Awe mesun partido kier bin pidi pa duna nan otro opportunidad pa sigui goberna. Si prome cu pandemia nos situacion no tabata di e malo ey ta con lo bai goberna nos pais despues di e situacion cu nos ta den?

Un gobierno cu a entrega nos autonomia dia 13 di November 2020 y cu a pone un landspakket riba cabez di pueblo di Aruba.. Un landspakket cu ta jena di medida y ta un peso enorme cu nos pueblo no por carga mas.  Si e landspakket wordo implementa manera e ta hopi ambtenaar lo wordo manda cas y perde vakantieuitkering y e otro premienan.

Un btw di 12.5% riba e prijs actual lo ta desastroso pa e pueblo di Aruba. Tambe ta para cu AZV cu pueblo mester paga un eigen bijdrage y riba dje  ta spaar 5 miyon florin riba salud di nos pueblo. Nos grandinan ta esnan cu mas ta sufri di e medidanan aki. E unico cos cu e medidanan aki lo hasi ta caba di kibra nos economia y lo crea pobresa den extremo.  Esaki ta e motibo pa kiko nos di partido Curpa ta contra.

Un gobierno cu a bai di acuerdo cu e landspakket y a firma dia 13 di november 2020  e acuerdo di coho lo no por renegocia un acuerdo cu nan mes a pone su firma bao di dje.  Aruba e jega tempo pa nos sali di spiral vicioso cu nos ta den.  Pesey mes ta hopi importante pa trese un cambio den e destino di nos isla. Tur caminda den pueblo bo ta tende cu nan ta bisa ni geel ni berde. Pesey mes pueblo di Aruba vota pa e cambio y vota pa Partido CURPA cu lo hasi e differencia dia 25 di juni 2021. Partido Curpa ta e unico partido cu ta para pa e principionan di Dios. Tur otro partidonan politico a laga e principionan di Dios cai.

LEAVE A REPLY

Please enter your comment!
Please enter your name here