Hopi interes tabatin pa e veredicto di huez den e caso entama pa partido opositor AVP. Nan no a keda contento cu e decision di ministro di Asunto General pa no duna e partido(nan) politico cu pidi, e lista di votador. Anteriormente tabatin e intencion di duna nan e lista di votador, pero sin nan adres. Esaki aparentemente considerando cu e demas datonan no tabata relevante pa e partidonan y cu lo por conduci na mal uso, loke na su turno lo viola privacidad di e ciudadano. Manera nos a anticipa caba den nos editorial di ayera, huez cu mester a tuma un decision provisional den e conflicto aki, a considera cu e decision mas fundamental, den ki sentido e entrega di e informacion na e partidonan lo ta en pugna cu e Convenio (Europeo di Derecho Humano; Roma 1950; EVRM na Hulandes), ta pertenece den tratamento di e caso principal (bodemprocedure) cu mester sigui.

Importante ta pa constata cu huez a dicidi di suspende e decision gubernamental tuma; den e sentido aki e partido politico a sali gana, pero huez tabatin comprension tambe pa e posicion di gobierno y Conseho Elecctoral cu ta haya cu duna tur informacion por conduci na mal uso di e informacion, sigur entrega den forma digital. Asina huez a considera cu e partido no tin pakico di haya tur informacion di e ciudadano, y specificamente a nenga di duna e partido acceso na e adres y fecha di nacemento di e ciudadano, y mas importante ainda, a nenga di duna nan e informacion den forma digital. Esaki ta un señal cla cu huez tambe ta mira e peligro di elaboracion y mal uso di dato digital den man di un partido politico. Esey ta un punto na fabor di esnan cu ta preocupa pa privacidad di dato personal den man di politico, aunke den e veredicto di ‘Salomon’ aki ningun partido a haya loke nan a desea pasobra huez a dicidi cu, como e no ta bay mete den e asunto di principio, den e veredicto provisional aki e ta scoge pa busca un balance entre e interesnan envolvi.

Den futuro cercano tin dos asunto importante cu mester tuma lugar. Uno ta e continuacion di e caso den bodemprocedure unda huez lo bay huzga definitivamente riba e asunto aki. E otro ta cu na nivel politico mester bin un decision kico ta haci cu e articulo specifico aki, en vista di un revision general di e ley di eleccion, algo cu mester a sucede basta tempo pasa caba. Aki nos por mira kico nos ta gana cu semper keda pospone cos envez di actua di biaha. Pregunta central den e cambio di ley, fuera di otro puntonan, ta si ta bay aboli e parti aki completamente, o ta permiti partido politico un acceso mas limita na e informacion di ciudadano, si ta considera esey esencial si of no. Finalmente, ta un mayoria den Parlamento den futuro lo dicidi kico ta keda aproba. E hasta por bira parti di e programa di gobernacion, si e partido(nan) cu lo goberna haya esaki un tema cu nan ta pone den nan planificacion pa crea legislacion nobo.

Un aspecto cu lo mester trata den un eventual cambio di ley ta e argumento di e partido politico opositor den e litigio trata, cu acceso na e datonan di e ciudadano ta esencial pa nan por haci nan trabao riba e dia di eleccion, loke ta importante pa mantene transparencia den e proceso electoral. A menciona e argumento di cu mester por verifica cu e votador ta aparece di berdad riba e lista di votador y cu despues mester por verifica e cantidad di persona cu di berdad a haci uso di nan derecho di voto, of no, na cada urna electoral. Sin bay den discusion si esaki actualmente ta suficientemente garantiza, ta importante pa dedica atencion na e punto aki. Ora ta trata di eleccion, ta trata principalmente di confianza di tur den e sistema. Esey ta requeri cu tur parti envolvi mester por tin e confianza ey. Sin embargo, e necesidad di transparencia no ta duna derecho absoluto, sigur no si te awe no tabatin ningun control kico realmente un partido politico ta haci cu e datonan di e ciudadano. Ta un secreto publico cu e partido cu a entama e caso tin un database bastante extenso cu dato personal di e ciudadania, unda por haci e pregunta si esaki itin un base legal. No ta pornada cu durante tratamento di e caso a insisti riba ricibi e informacion digital, algo cu e huez a nenga inmediatamente. Esey ta un señal cu ey e propio huez a ripara cu tabata necesario pa hala un linea y a duna solamente nomber y lugar di vota, riba papel.

E linea ey ta necesario tambe, pasobra contrario na 70 aña pasa, awendia file grandi di dato di persona tin un valor financiero. Y esey ta haci e pregunta surgi: Y kico e partido (en general) ta haci cu e datonan aki? Ki uso nan tin pa esakinan cu den Corte ta necesario enfatiza cu mester haya nan digital? Huez a tuma un decision por lo pronto pa bon di e proceso electoral e siman aki. No tin nada regla actualmente encuanto uso/abuso di informacion digital den proceso electoral. No laga esaki drumi cuatro aña.

 

LEAVE A REPLY

Please enter your comment!
Please enter your name here