Mas cu 80% di pueblo di Aruba ta anhela di mira un cambio den gobierno. Lastimamente nos tin un gobierno cu no tin oido mas pa pueblo. Ora cu un gobierno bira lomba pa su pueblo y sin tin un sperasansa pa un mihor futuro, anto nos ta den un problema. Orguyo di gobierno a yega su top y locual cu ta speranan ta nan caida.

Nos por a mira cu a pusha e contract di Eagle LNG cu te cu awe a keda secreto. Nos di partido Curpa ta contento cu VWI a lanta para y a bai ministerio publico pa pidi un investigacion. Esnan cu ta sinta den e conseho di supervision tambe lo ta responsabel si cosnan contra ley lo a tuma lugar den e contract cu a firma cu Eagle LNG. Awor kier forsa pa bin cu e Molina di biento. Esaki ta momento pa esnan cu ta sinta den e conseho di supervision reflexiona y hala atras pa permiti investigacion di cosnan cu a bay contra ley. Bo ta sinta pa defende interes di pueblo di Aruba y di ningun partido politico. Ora e cayente bin boso ta e prome nan cu lo kima. E consequencia lo ta hopi mas grandi cu e compensacion cu bo ta cobra pa luna.

Otro debacle ta e declaracion di e minister encarga cu Serlimar y e planta di purificacion. Ela trese informacion pa dilanti cu no ta cuadra cu berdad. Nos di partido Curpa ta kere den e proverbio cu ta bisa: dime con quien andas y te dire quien eres. Tristo ta cu nada cu nos gobierno ta trese pa dilanti ta cuadra cu berdad. Nos no por spera otro si nan a firma asina hopi protocol y na final di dia nan no ta cumpli toch.

Laga nos mira si e minister lo cumpli cu habitante di Parkietenbos y vecindario esta di lo cerra dump. Nos sa cu meimei di December dump lo cerra di mes pa via cu nan ta baha cu vakantie y lo ta back na januari 2023. Un otro cos cu nos por a tuma nota di dje ta cu e planta di purificacion na Bubaliplas no ta haya attencion y esnan cu ta biba ey banda ta haya molester di e holo. Mas tristo ta cu a bolbe laga e awa bay lama y e awa aki si ta contamina nos lama y mas ainda cu turistanan cu ta hasi uso di nos beach. Stop di papia y cuminsa actua. Nos no ta nan pero nos a bira mesun cos cu nan.

Un otro informacion cu a jega na nos di partido Curpa ta e presupuesto 2023. Segun nos por a compronde cu a hinca e presupuesto den otro cu cifra cu no ta cuadra cu realidad. E GDP tabata ta 5.8 y despues diripiente ta usa un GDP di 6.2 pa asina papia di un surplus di 63 miyon riba e presupuesto 2023. Na prome instante tabata tin un surplus di 25 miyon. Simpelmente nan a konkel cu cifras. Europa y Merca ta den recession y esey lo affecta e economia mundial. Ta premira cu den e prome cuartal 2023 e economia mundial lo colapsa por completo.

Ki consequencia esaki lo tin pa Aruba? Un otro cos cu pueblo mester tene cuenta cu ne ta alimento. E prijsnan a subi drasticamente y nos mester ta prepara pa locual cu ainda falta pa bin. Esaki ta e momento nos pueblo cuminsa sembra sikiera den escala chiquito pa tin pa mayan.

Nos di partido Curpa ta kere cu ainda tin hopi hende di bon curason riba nos isla y cu ta stima nos Aruba dushi terra. Nos tin un Parlamento cu ta apoya gobierno den su maldad. Introduccion di leynan hende cu bai contra di leynan di Dios ta mesun cos cu hasi boffon di Dios. Un cos ta sigur ningun hende por burla Dios y sali ganador. Un gobierno cu primiti un cambio pa mihor, a bira un cambio pa pio.

Ora Dios rechasa un gobierno pa inhusticia ta paso cu su tempo a yega. Esaki ta e tempo pa hendenan husto goberna pa tin cambio. Aruba mester di un cambio y un fundeshi solido pa construi un Aruba nobo.

LEAVE A REPLY

Please enter your comment!
Please enter your name here