Luna internacional di derechonan di mucha casi ta bay culmina unda por a mira diferente actividad rond di e isla y tambe na diferente scol. Pero di otro banda, mayor y docentenan ta consciente cu kico e muchanan awendia ta bezig riba internet?

Bon Dia Aruba ta trece dilanti informacion importante tocante muchanan y hobennan, kico nan ta haci riba internet. Awendia tecnologia ta tur caminda y nan ta haci uso di telefon y dispositivonan electronico pa haci diferente cos, como por ehemplo ora nan ta siña y tambe den nan tempo liber pa hunga.

Mester tene den consideracion cu mucha y hoben ta e poblacion mas vulnerabel ora nan ta haci uso di tecnologia. Ta importante pa papia cu nan tocante e aspectonan positivo di loke ta tecnologia y rednan social incluyendo e weganan online cu hopi biaha, e muchanan ta bira adicto na e weganan aki.

Igualmente, ta existi e fenomeno ‘Hentai’, un anime Hapones unda nan produccionnan a logra surpasa casi 60% di contenido di television na nivel mundial, moviendo casi 20 miyon dollar, cu un publico of target ‘hopi amplio’ unda nan ta crea contenido pa tur edad, for di 0 aña te cu hende adulto.

E origen di e palabra ‘Hentai’ ta nifica pervertido na Hapones y riba internet ta indica cu e ta bin for di e transformacion y liberacion sexual cu a sucede na henter mundo den e decada di añanan 1960. Pero e genero aki no ta destina pa keda transmiti riba television; ta existi plataformanan riba internet no hopi comercial cu ta ofrece un variedad amplio di serienan dirigi pa publico adulto.

Riba internet, ta bisa cu pornografia ta un escape for di realidad, y hopi consumidor di Hentai ta sigura nna mes na e escape aki pa bandona e realidad completo a traves di animacion. Y aunke e tipo di anime aki no ta curpanan real, hopi topico cu por haya na hentai ta pornografia cu ta normalisa violencia contra hende muhe y mucha muhenan, ademas ta normalisa e sexualidad di muchanan homber.

Bon Dia Aruba kier informa comunidad cu e fenomeno aki ta bin tumando luga na scolnan, unda cu muchanan di 8 aña bay ariba a cuminsa busca videonan riba internet di e tipo di animacion aki yama “Hentai Porn” conoci como anime pornografico.

Bon Dia Aruba contacto cu Jeanmiree van der Werf, ken ta trahado preventivo di Fundacion Respeta Mi, pa asina trece dilanti kico mayornan por haci den un caso similar cu nan yiu y con nan tin cu deal cu e situacion.

Na prome luga, el a indica cu esaki tambe ta disponibel den weganan online cu ta involucra muchanan y por sirbi como un herment pa cu abusadonan of pedofielnan por mustra na nan victimanan prome cu abuso tuma luga, pa asina nan ta prepara pa e abuso sexual, cu ta un di e temanan comun di hentai.

Awendia, hopi mayor no ta conoce kico nan yiunan ta haci ora nan ta usa un dispositivo electronico como telefon, tablet of un computer cu conexion na internet. Mayornan no ta consciente di e tipo di pornografia cu cada dia ta mas accesibel, dunando e bentaha na muchanan pa nan por wordo absorbi pa algo cu por causa un adiccion pa nan yiu.

Ta p’esey cu e topico aki ta bin dilanti, pa asina trece conscientisacion y educa riba e efectonan perhudicial di loke e tipo di anime aki ta haci cu mucha, cu hoben y tambe cu adultonan.

Muchanan por wordo exponi boluntariamente y imboluntariamente na contenido explicito incluyendo pornografia. Pero e pregunta ta: Kico como adulto por haci ora muchanan ta wak pornografia?

Van der Werf a menciona cu no ta por nada ta wordo bisa: “Talk to you kids about sex before the internet does” – esta, papia cu bo yiunan tocante sex prome cu internet hacie.

Un mucha su desaroyo sexual ta cuminsa di baby caba, ora e mucha bira un peuter/ kleuter e lo por bira curioso pa loke ta trata su curpa, entre otro su parti intimo. E kier sa dicon di dje ta mustra otro cu di su ruman of cu di otro mucha, tambe e kier hunga weganan manera ‘dokter’ pa explora. Loke ta importante ta pa mayornan t’ey pa contesta nan preguntanan. Si ta laga nan cu pregunta, nan mes lo por cuminsa busca contesta y no ta tur ora nan lo ricibi informacion corecto.

Ta importante pa tuma e siguiente pasonan:

– Keda trankil: E mucha ya a wordo exponi na pornografia, nada lo por cambia e hecho aki. Bis’e cu kier papia cune tocante loke el a wak. Purba di keda neutral y no usa un tono menasante. Si no, e mucha ta bay cera y lo no ta habri pa comunica mas. Haci e combersacion ariba e mesun dia, pero no di biaha cu a ripara cu e yiu ta wak pornografia. E meta principal di e combersacion aki mester ta pa haci e mucha ta consciente cu e “sex” cu e ta wak den pornografia aki no ta real y cu esaki ta ful otro cu sex cu ta sosode entre pareha cu ta respeta y consenti pa haci sex cu otro.

– Si ta haya dificil pa papia di e topico aki, skirbi algun punto cu lo kier trece dilanti ariba un papel. E ta esencial pa ta honesto y usa informacion corecto. Esaki kiermen cu lo mester usa e nomber biologico manera vagina, vulva, penis, ano, pecho, etc. y no inventa nomber straño pa e partinan intimo. Esaki lo contribui tambe na e disminucion di berguensa asocia na topiconan tocante sexualidad.

Paso 1: Bisa e mucha cu bo ta na altura cu e ta wak pornografia

Paso 2: Bisa e mucha cu no mester tin berguensa pa discuti topiconan di sexualidad y cu e ta ok pa acerca bo si e tin pregunta.

Paso 3: Bisa e mucha cu sex en realidad no ta pasa manera e ta wak den pornografia, aki por comparti bo mesun experencia cu sexualidad y por duna splicacion tambe tocante e aspecto social emocional, pero tambe e diferencia entre sex y intimidad.

Paso 4: Splica cu “sex” den pornografia ta mustra otro cu e “sex” den bida real, splica e mucha cu cada persona tin un curpa diferente y cu e curpa di e personanan cu el a wak den e video por ta mustra otro cu di dje y esaki ta okay. E splicacion aki ta relaciona cu e autoestima di un mucha, cu lo por cuminsa compara su curpa cu di otro persona

Pa finalisa, ta importante pa encurasha e mucha pa haci pregunta. Sigura e mucha cu abo ta su adulto di confiansa y cu e lo por acerca bo cu cualkier pregunta. E ta importante pa keda habri, honesto y pa no hinca berguensa ni miedo den un mucha.

LEAVE A REPLY

Please enter your comment!
Please enter your name here