Nos ta drentando e ultimo dianan di aña 2021. Un aña cu pa hopi di nos no tabata uno facil. E tabata un tempo hopi dificil pero laga nos tum’e como un tempo di preparacion y cu lo yuda nos bira mas fuerte pa nos por sigui lucha. Tur comienso tin su final. Problemanan tambe tin fechanan cu nan ta caduca. Nada lo dura pa semper.
Aruba no ta pasando den su miho tempo. Un cos nos no por haci ta di entrega. Cada dia nos lanta nos tin cu gradici Dios cu nos por a mira un otro dia y cu nos tin e speranza cu e situacion lo cambia. Nos actitud lo mester bira uno di cu si nos por. Nos por cai pero cu fe den Dios nos ta lanta back riba nos pia y cu nos lo ta miho prepara.
Laga nos por habri nos curason y pidi nos Dios Tata Todopoderoso forsa pa nos por sigui pa dilanti. Unda nos a faya laga nos pidi pordon. No keda cu odio y rencor warda den bo curason. E unico cos cu ta haci ta trece amargura. Nos bida na e mundo aki ta pasahero y ta cortico. Bida ta un les ya siña nos cu ora nos pordona nos ta bira liber y nos lo mira e situacion den bida diferente. Laga nos tuma e decision ey y nos bida lo cambia. Ban pe y nos lo logr’e sigur.
Nos ta den e temporada di Pasco y ta un fecha cu nos ta recorda e nacemento di Jesus e yiu di Dios. Nos Tata Celestial a mando nos Su unico yiu pa tur cu kere den dje no bay perdi ma pa tin bida den eternidad. Laga nos habri nos curason y pidi Dios pordon pa nos fayonan of erornan y laga nos invita Hesus pa bin biba den nos curason y cu Su paz duna nos e forsa pa sigui lucha y pa mira bida na un manera diferente.
Laga nos pasa e Pasco aki den seno familiar y pa esnan cu a perde nan sernan keri nos pidi Dios pa duna nan forza y cu e paz y amor di Dios sigui carganan. Nos deseo di partido Curpa ta cu paz, amor y felicidad por reina den cada hogar aki na Aruba y cu Dios drama Su bendicion den cada cas aki na Aruba y cu e Aña 2022 trece dicha, paz, amor y prosperidad. Un Bon Pasco y Feliz Aña 2022 na henter pueblo di Aruba ta nos mas sincero deseonan parti di partido Curpa.
