(AP) — Bao presion for di reguladornan di seguridad di vehiculo Mericano, Tesla a bay di acuerdo pa stop di permiti pa hunga wega riba pantayanan touch screen mientras e vehiculo ta move.
National Highway Traffic Safety Administration ta bisa cu e compania ta bay manda un actualisacion di software riba internet pa asina e funcion ‘Passenger Play’ ta bay ta lock y no ta bay traha mientras e vehiculonan ta move.
E movida ta bin un dia despues cu e agencia a anuncia cu ta bay inicia un investigacion formal riba preocupacion pa chauffeurnan distrai pa video game di Tesla, algun di cual por hunta mientras ta core auto.
Un vocero di e agencia a bisa den un declaracion ayera cu e cambio a bin despues cu reguladornan a discuti preocupacionnan tocante e sistema cu Tesla. E prome actualisacion a sali diaranson como parti di e lansamento di dianan festivo di Tesla, y e resto di e vehiculonan lo mester a hay’e ayera.
E declaracion ta bisa cu NHTSA regularmente ta papia tocante pantayanan di infotainment [red: informacion y entretenimento] cu tur fabricante di auto. Ayera AP a laga un mensahe solicitando comentario di Tesla, cu a desmantela su departamento di relacionnan di media.
E agencia a bisa cu su investigacion di e caracteristica di Tesla ta bay continua hasta despues di e actualisacion. No tabata cla si NHTSA ta bay rekeri pa Tesla haci un recall formal cu e actualisacion. Den pasado, e agencia a puntra Tesla pakico no mester rekeri pa haci recall cu actualisacionnan di software relaciona cu seguridad. “E ley di seguridad di vehiculo ta prohibi fabricantenan di bende vehiculo cu defectonan cu ta pone riesgonan iracional pa seguridad, incluyendo tecnologianan cu ta distrae chauffeurnan di core responsablemente”, e declaracion di NHTSA a bisa. E agencia a bisa cu ta evalua con fabricantenan por identifica y protege contra peligro di distraccion pa motibo di maluso of uso intencional di pantaya of otro tecnologia di conveniencia.
Diaranson e agencia a anuncia cu ta bay investiga formalmente e pantayanan di Tesla despues cu un doño den area di Portland, Oregon a entrega un keho na momento cu el a descubri cu un chauffeur tabata por hunga wega mientras e auto ta move.
E agencia a bisa cu e caracteristica di ‘Passenger Play’ por distrae e chauffeur y aumenta riesgo di un accidente.
E investigacion ta cubri alrededor di 580mil Tesla Model S, X, Y y 3 for di añanan 2017 te 2022.
Den documentonan detayando e investigacion, NHTSA a bisa cu ‘Passenger Play’ tabata disponible desde december 2020. Prome cu esey, tabata posible pa permiti hunga wega solamente ora e vehiculo tabata para.
Documentonan di NHTSA no ta lista ningun accidente of herida resultando for di e problema aki.
Doño di un vehiculo Tesla, Vince Patton di 59 aña di edad a entrega un keho luna pasa despues di descubri cu e chauffeurnan por a hunga cu e caracteristica di wega. Patton, kende ta stima su auto y ta bisa cu e no tin nada contra Tesla, ta preocupa cu chauffeurnan ta bay hunga wega y bira peligrosamente distrai. “Un persona ta bay resulta morto”, el a bisa. “Ta absolutamente loco.”
NHTSA ya ta investigando pakico ‘Autopilot’ di Tesla, e sistema di core parcialmente automatisa, ta keda crash den autonan di emergencia para. Tambe ta investigando e prestacion di e software ‘Full Self-Driving’ di Tesla despues di ricibi un keho cu a hera causa un accidente.
Tesla ta bisa cu ningun di e sistemanan por core e vehiculo, y cu chauffeurnan mester pone atencion y ta prepara pa interveni na tur momento.
