Confiansa ta no ta algo cu cay for di cielo y no ta un cos dia anochi pa mainta. Confiansa bo ta crea ora bo ta cumpli cu palabracion nan haci. No por ta asina cu bo ta firma un acuerdo y bo no ta cumpli cune.

Nos tur sa cu Hulanda no tin confiansa den e gobierno di Aruba paso nan no ta cumpli cu locual cu nan ta firma. No ta un secreto cu e landspakket ta den su fase pa wordo implementa. No por papia di negociacion paso esey a tuma lugar caba. Locual cu tin cu tuma lugar ta e contenido cu a firma diabierna 13 di November 2020.

Gobierno ta reuni cu sindicatonan pa gana tempo y no tin seriedad den e negociacion. Esaki ta simplemente pa gana tempo. Locual cu mester tuma lugar ta ki dia cierto medidanan mester tuma lugar. Locual cu gobierno no wordo implementa den su tempo a wordo hala pa un otro fecha. Riba agenda di landspakket tin e cambio di LMA y mester wordo trata den parlamento proximamente pa por reduci e empleadonan gubernamental.

E medida di 12.6% a wordo proponi pa gobierno di Aruba y e identidad Hulandes a tum’e impone riba demas islanan. E medida aki a cay den mal tera riba cerca e otro islanan. Nos ta corda riba un dialuna a bay asina leu di bisa sindicatonan cu lo no mishi cu salario di empleadonan publico y hasta a firma un acuerdo cu lo no kita placa for di nan salario. E siguiente dia e empleadonan publico ta haya sorpresa di nan bida ora cu nan a mira nan payslip. Nan salario a wordo baha cu 5%. Bo no por spera otro di un gobierno cu ta carece di integridad. Locual cu a pone awa pasa hariña ta ora cierto nv’s di gobierno no a entrega e 12.6%. Akinan a keda demostra cu no tin transparencia y a caba di termina cu e tiki confiansa cu ta keda den gobierno. E entrega supuestamente lo mester pa yuda esnan cu a perde entrada y esaki a resulta den un otro engaño. E actitud di gobierno cu si bo no ta gusta mi ta hacie ley a cay den mal tera. Bo no por negocia cu machete riba mesa.

Fase y loonsubsidie a wordo subsidia cu placa presta for di Hulanda. Un prestamo y no un placa regala. Un otro peso riba lomba di nos pueblo sin conta e prestamo aña pasa y esun di 84 miyon florin di e aña aki. 80 miyon florin di mas a wordo paga. SVB a logra recupera 8 miyon cu a wordo paga di mas y ainda tin 72 miyon di fase y loonsubisdie ta ariba caya. Ken ta para responsabel pa esaki? Conclusion ta cu no tabata necesario di a kita 12,6% for di e empleadonan publico mas ainda cu no ta tur nv’s di gobierno a entrega e 12.6%. Mas cu un aña largo empleadonan publico a entrega mientras cu e otro institucionnan di gobierno no a entrega. E situacion a bira pio ora a yega na horea cu cierto nv’s nan si ta haya diferente beneficio. Esaki ta causa cu no tin confiansa mas den gobierno y a pone cu e situacion a bira mas pio.

Cada dia e gobierno aki sin integridad keda mas nan ta hinca e pueblo di Aruba den problema.

Un placa mal ranca lo bo no gosa di dje.

LEAVE A REPLY

Please enter your comment!
Please enter your name here