Pa añas nos pueblo a vota pa partidonan politico tradicional cu durante campaña a trece yen di promesa pa gana pueblo su confiansa y pa haya voto pa drenta parlamento y eventualmente forma parti di gobierno. Berdad cu campaña ta un cos y goberna ta un otro cos.

Durante campaña pueblo ta haya nan number di celular y despues nan ta cambia nan number di celular y nan ta lubida ken bo ta. Durante campaña politiconan ta duna bo tur ilusion y despues di eleccion bo ta haya un desapunto y un decepcion. Mi ta kere cu e ultimo 20 aña pueblo mester por conoce e politiconan gañadornan aki. Esakinan ta e lobo bisti na carne. Prome cu eleccion nan mester di bo voto y despues di eleccion bo ta haya medida tras di medida como regalo.

 

Nos di partido Curpa no ta decepciona cu e resultado di eleccion, paso pueblo despues di 5 añanan por tin un bista cla ken ta e lobonan y ken ta e carnenan. Ken tin bienestar di nos pais Aruba na pecho y ken berdaderamente tin nan interes personal na pecho. Mi ta kere mas claro no canta un gayo. Awor aki locual cu nan ta haciendo ta coba nan graf despues di a causa tanto daño na nos baranca Aruba dushi tera cu tur e engañonan. Locual cu nan a sembra nan lo cosecha sigur den un tempo cortico nos dilanti.

A core cu director di DIMAS paso el a para firme y paso e no ta hinca su mes den problema. Nos por corda di e ilegal cu a drenta nos isla via nos costa cu a wordo gara pa warda nos costa y pa despues wordo poni den libertad riba mesun dia cu permiso den su man. Despues ta laga un persona di origen dominicano den libertad despues di a perde su caso dilanti hues y mester a wordo deporta pero minister ta cambia e decision di hues. Esakinan ta motibo pakico mester a core pa cu e directora di Dimas paso e no ta bay na amen di e minister concerni. Tipo di decision nan asina a pasa na e pais bisiña cu ta uno comunista. Mester hala e director y pone un hende cu ta baila na su amen. Esaki ta locual cu tambe a sosode cu e directornan na WEB NV pa asina Eagle LNG haya su entrada na Aruba y sin cu te awe pueblo haya sa e contenido di e contract locual cu pueblo di Aruba tin derecho riba dje. Awe e gas natural ta mas caro cu nunca y ta 3 (x2.88) bes mas costoso cu e heavy oil cu WEB NV ta usa.

E presupuesto 2022 no a wordo aproba pa CAFT y pa nos di partido Curpa no ta nada nobo paso di adelanta nos a mir’e caba. Si nos parlamento di Aruba forsa di pasa e presupuesto aki cu un deficit 290 miyon florin ta paso nan ta busca problema unda cu no mester. Gobernador lo no firma e presupuesto 2022 pa bira ley. Biaha pasa nan ta bisa cu nos prome minister a bebe ensure pero e biaha aki nos sa kico nos prome minister lo bay bebe? Gobierno lo baha gasto pa medio di medida den e presupuesto? Paso placa gobierno lo no haya fia. Gobierno ta lomba contra muraya. Mas hundo e herida ta mas tempo lo e tarda pa cura.

Cada dia nos situacion financiero ta bira pio pa nos grandinan y esnan di menos recurso. Costo di bida ta subi tur dia y cartera di pueblo ta bira bashi cada dia cu pasa. E unico cos cu e medidanan lo haci ta stroba nos desaroyo economico. E aumento di prijs lo bay pisa riba nos unico pilar economico cu ta turismo. Nos ta den un crisis mundial cu nos isla nunca no ta prepara p’e. Awe nos ta esclavo di debe pa falta di un maneho y falta di vision.