Poco tempo pasa nos Parlamento aproba nos presupuesto 2022. No ta un secreto publico cu CAFT no aproba e presupuesto 2022 pa via cu tin un deficit grandi den dje. Laga nos mira kico lo pasa cu e presupuesto 2022 cu si gobernador lo pone su firma bao di dje.

Den e presupuesto tin hopi medida cu mester wordo tuma. Nos pueblo no por mas cu tanto medida paso nos cartera no ta soporta mas peso. Nos pueblo ta sufriendo caba paso placa no ta yega y tin hopi hende cu ta bibando den pobresa pa no bisa den miseria.

Nos gobierno no a crea ningun otro pilar economico pa Aruba tin mas entrada. E gobernacion den e ultimo 5 aña nan aki ta debe ta nan proyecto. Gobierno kier gaba cu Eagle LNG pero nan no tin nan propio pos di gas. Mas bien nan ta bin pa gana placa riba custia di nos pueblo. Eagle LNG ta un simpel intermediario. Nan ta cumpra e gas y bin bende cu WEB y saca ganashi riba custia di nos pueblo. Den e tempo cu nos ta bibando gas no lo yuda baha e prijs di awa y electricidad. Gas lo sali hopi mas caro cu e heavy fuel.

Hulanda despues di a regala Italia biyones di euro awor kier saca placa riba e pueblo Hulandes. Nan ta papia di entre 10 pa 15 miljard euro door di hisa inkomsten belasting y grondbelasting. Nos sa cu e gabinete Hulandes tin hendenan World Economic Forum cu tin e lema di cu “Lo bo no tin nada y lo bo ta contento”. Nos por mira parlamentario Hulandes Gedeon Van Meijeren ta haciendo un tremendo trabao na Hulanda.

Nos sa cu den e landspakket tin hopi medida hinca y tambe cu ta pidi pa hisa inkomstenbelasting. Gobierno no kier baha gasto riba personal y keto bay ta emplea mas hende den e servicio di gobierno. Esaki ta un peso enorme riba lomba di pueblo. Den 5 aña bao di maneho di e gobierno aki nos debe nacional a subi di 70% pa 128% di no gbp. Esaki ta duna nos di compronde cu e herida ta profundo lo tuma tempo pa sanea pero sigur sigur no bao di maneho di e gobierno aki. E entrada di Aruba lo yega ora tin hende husto ta goberna y sa cu nan ta un simpel administrador y no doño.

Situacion internacional a sigui escala y nos situacion aki na Aruba ta bira pio nos gobierno no tin vision y no tin solucion. A pesar di a campaña cu nan conoce e materia y cu lo goberna sin medida pero a haci net lo contrario. Esaki ta e tempo cu nos pueblo mester busca cara di Dios pa solucion. Solamente cu e sabiduria di Dios lo saca Aruba padilanti. Un gobierno cu ta bay contra leynan di Dios no tin solucion sino al contrario sino maldicion. Si bo sembra bondad lo cosecha bondad pero si bo sembra leynan cu ta contra leynan di Dios no por tin bendicion. Hendenan cu nan curason ta leu di Dios lo no tin solucion. Nos ta bibando den e tempo cu tur maldad lo wordo expone. Ainda tin chance pa arepenti y busca cara di Dios. E dia lo yega cu e huicio di Dios lo baha y e ora kizas lo bo ta laat.