Si gobierno no cay e aña aki otro aña na juni lo tin eleccion. E matrimonio den e coalicion aki ta den crisis. Nan por nenga pero ta un echo cu no tin amor mas den e coalicion cu ta forma gobierno. Ta cuestion di tempo y cua ta e miho tempo pa e partido MEP of Raiz saca probecho di e situacion.
Na aña 2017 un total di 13.214 persona no a vota pa partido MEP ni partido AVP. Na 2021 el a aumenta na 19.550 y nos di partido Curpa ta kere cu e lo sigui aumenta te cu 25.000 of hasta surpasa 30.000 persona cu lo no vota pa e partidonan grandi. Nos sa cu tanto partido MEP como partido AVP ta kere den e metanan di Desaroyo Sostenibel of Sustainable Development Goals esta e agenda 2030. Nos por corda 23 september 2015 tempo partido AVP tabata den gobierno a dorna nos parlamento y aña pasa 2023 gobierno di partido MEP no solamente Bestuurskantoor sino L.G. Smith Boulevard te cu e brug banda di Wilhelminapark.
Dia 10 di November 2023 e pueblo cristian a manifesta contra di e matrimonio di mesun sexo y a entrega un manifiesto cu e 18 mil firmanan na vice prome minister. Nos di partido Curpa ta corda ainda 8 di September 2016 tempo cu a aproba e amienda 7 esta e geregistreerd partnerschap ora cu partido AVP y partido MEP a brasa otro cu 11 voto na fabor y 5 contra. Na 2021 dia cu a vota pa e codigo civil nobo cu den dje e partnerschap. Ela pasa dia 1 maart 2021 cu 17 voto na fabor y 4 contra y dia 30 di maart 2021 gobierno a cay. Gobierno a bay cassatie despues cu a pone presion y na mei 2024 lo tin sentencia. No tin diferencia entre e partidonan politico aki paso nan tur ta di acuerdo cu e matrimonio di mesun sexo. E 18.000 firmanan aki lo por representa un 7 asiento den e proximo eleccion.
Situacion mundial ta cambiando y poco poco e partidonan socialista ta perde poder. E aña aki lo mester tin eleccion pa Parlamento Europeo y tur cos ta mustra cu lo bin cambio grandi. Esaki ta haci cu e Sustainable Development Goals lo cay na awa. Nos por mira caba con e miembronan di World Economic Forum den gobierno di diferente pais a cuminsa sali na careda.
E proximo eleccion ta hopi importante pa e pueblo Cristian. Na 2017 y 2021 pastornan cu ta contra partido Curpa a dividi nan iglesia pa vota pa partidonan MEP y AVP. E resultado ta conoci y e pueblo Cristian no tin bos den nos Parlamento. Si for di 2016 a para banda di e pueblo cristian awe e situacion lo ta diferente. A yega na nos oido cu e pastornan Cristian aki kier funda un partido politico y siguramente nan lo haci uso di e lista di e 18.000 firmantenan. Nos no por sigui un lider cu ta anti cristian. E parlamentarionan supuestamente Cristian cu ta apoya nan partidonan contra leynan di Dios no ta para pa e pueblo Cristian. Nos por a scucha e discurso di ministernan di partido Raiz dia di e manifestacion di 10 november 2023 cu nan ta na fabor di e matrimonio di mesun sexo y e parlamentarionan supuestamente Cristian a keda keto y asina para banda di un gobierno cu ta anti cristian. E supuestamente parlamentarionan cristian aki ta responsabel pa e persecucion di e pueblo Cristian sin no bin un cambio den gobierno. Nos ta bibando den un tempo biblico y no por permiti nos Fe mengua. Partido Curpa ta keda e unico alternativa.
