image.jpeg

Mientras cu ainda e proceso di contamento di voto ta tumando luga manual na Republica Dominicana, caminda e actual presidente Danilo Medina ta wordo considera como virtual ganado, akinan na Aruba ya caba pa diadomingo mei anochi e resultado a wordo conoci di e eleccion Dominicano celebra na Centro di Bario Playa Pabou.

E funcionario auxilia di Consulado Dominicano na Aruba, sra. Crusita Mercedes a informa na Bon Dia Aruba cu sr. Danilo Medinaa gana rotundamente na Aruba. “E sr. Danilo Medina Sanchez ta encabesa e lista cu un diferencia grandi di locual tabata nan expectativa”,  el a bisa. 

Resultado 

Sra. Crusita Mercedes a indica cu e resultadonan na Aruba ta mustra cu un 75% di voto conta, tabata na fabor di e presidente actual y lider di Partido di Liberacion Dominicano (PLD). El a divulga e resultado di e celebracion di eleccion Dominicano na Aruba ta mustra cu 789 voto a bay pa PLD, mientras cu pa e Partido Revolucionario Dominicano (PRD) di oposicion a logra 377 voto. 

Encuanto e resultado pa eligi e diputadonan di ultramar  cu ta representa e Dominicanonan den exterior den e Congreso Nacional, e PLD a logra 677, mientras cu e partido PRD a logra 333 voto. 

El a expresa su satisfaccion ya compara cu eleccion ultimo e eleccion general Dominicano di diadomingo ultimo celebra na Aruba ta esun cu mas voto a produci. E total di votonan deposita diadomingo ultimo pa eligi presidente Dominicano tabata di 1479 voto valido y 23 voto nulo, mientras cu e total di voto deposita tabata 1502. Pa loke ta trata e votacion pa diputadonan di ultramar tabatin 1432 voto valido y 70 voto nulo, mientras cu e total di voto deposita tabata 1457.

LEAVE A REPLY

Please enter your comment!
Please enter your name here