Lider indjan Wayuu: Tur hende tabata na expectativa di boto perdi La Rumbera

E noticia rond di e rescate sano y salvo di e pasaheronan abordo di La Rumbera, kendenan ta biniendo awe na Aruba fei Cartagena (Colombia), tin diferente enfoke informativo…. Un di nan tin di haber cu e comunidad Wayuu di peninsula di Guajira na Colombia.

E prome señal di speransa riba e paradero di e personanan abordo di e boto perdi aki a bini fei di e comunidad di piscado Wayuu di e localidad di Puerto Espada.

Prome contacto
Sra. Alicia Dorado Gonzalez (riba e potret) kende ta un Wayuu di e famia “Wuleewana” di e localidad di Nazaret (parti noord di Guajira) tabata un persona clave den e netwerk pa e prome señal di sobrevivencia di e personanan abordo di La Rumbera por a yega Aruba.

Bon Dia Aruba a tuma contacto cu Alicia kende a relata na e matutino aki cu el a wordo informa cu un grupo di Arubiano tabata perdi riba lama dor di Antropologo Wayuu, sr. Weildler Guerra kende por cierto recientemente a haci presentacion di su buki “El Mar Cimarrón” na Museo Arkeologico di Aruba (MAA).

Alicia a bisa cu sr. Guerra a tuma contacto cun’e, caminda el a manda tur informacion via un link p’e. Mesora e lider indjan aki a tuma contacto cu un amigo piscado di dje, sr. Osman Pantalion, kende tin un organisacion di piscado artesanal. E ta un micro empresa familiar integra pa miembronan di e comunidad Wayuu. E lider di e gremio aki a tuma contacto cu tur e piscadonan localisa fei area di Puerto Lopez.

“Tur hende tabata na expectativa. Tur piscado di e area a wordo informa pa nan ta alerta…”, el a bisa.

Localisacion
E prome contacto cu sra. Gonzalez a haya tabata cu e

indjannan a wak un boto blanco na haltura di e localidad yama como “Cojoro” y Flor di La Guajira. E anochi di diabierna tabatin un mal tempo locual a stroba e buskeda di parti di e indjannan.

E ora nan a keda di manda un hende pa check si ta trata di e tripulacion di La Rumbera. “Un persona a manda un lancha pa verifica cu esey tabata e boto…”, el a bisa. E ora ey nan a haya sa diasabra cu den oranan di merdia e grupo di La Rumbera a yega na un comunidad di indjan piscado.

Den e localidad aki ta biba varios famia of “clan of casta” Wayuu, ya cu practicamente e origen di nan “clan of casta” ta situa den e localidad unda e tripulacion di La Rumbera a yega. Segun nan mitologia indjan, e localidad aki ta e cuna di e rasa Wayuu, te hasta di e clan “Wudleewana”, cu actualmente ta den via di disparce, Alicia a bisa.

Solidaridad
El a declara cu den caso di calamidad e comunidad Wayuu ta hopi solidario, amical y hospitalario. Ademas el a recorda cu pa añanan e indjannan cu ta habita den e area entre Puerto Lopez te hasta Portete tabatin un bon relacion cu Aruba y Panama. “Prome nan a depende hopi di Aruba pa tur loke tin di haber cu alimentacion, awa, etc…”, el a bisa.

El a conta nos cu actualmente e indjannan di e localidad aki ta pasando den basta necesidad, specificamente pa falta di awa den e area di Portete, pasobra masha poco boto di Aruba ta haci uzo comercial di nan puerto. “Nan tabata esunnan cu tabata hiba awa pa nan bebe”, el a indica.

Sra. Alicia Gonzalez a bisa cu tin diferente persona cu a colabora cu e situacion aki, entre nan e coronel di Ehercito cu ta traha riba tereno social cu e comunidad Wayuu na Puerto Espada a brinda un gran colaboracion di “militar pa militar”.

“Nos a keda pendiente te ora cu finalmente nos a logra comunicacion cu un Coronel di Ehercito cu a tuma contacto cu base di Armada”, el a bisa. Nan a manda un team di infanteria, ya cu nan tabata localisa cerca unda e tripulantenan a yega.

Ta asina cu danki na Alicia Dorado Gonzalez su liderazgo den e comunidad Wayuu, el a crea un brug di comunicacion entre Osman Pantalon y e piscadonan. Mientras cu el a pidi e Coronel di Ehercito pa papia como militar cu e miembronan di Armada, y asina na Aruba por obtene tur informacion rond di e boto La Rumbera y su tripulantenan.

Na final, Alicia a expresa cu masha alegria y satisfaccion cu “tur cos a termina bon cu e grupo aki, danki na Dios”.