Partido CURPA ta kere cu Aruba a wordo bendi na un prijs di baca flaco pa nos prome minister. E agenda scondi aki no ta for di awor e la cuminsa. Nos por corda con MEP a presenta na Hulanda e rapport “Feestvierend ten Ondergaan”. E tempo ey partido MEP a dedica e rapport aki na partido AVP pa despues bin pa complementa e obra esta laga partido mep sigui cu e Feestvierend.

No lubida cu e agenda scondi aki a cuminsa tempo cu nos prome minister Hulandes a bay Nacionan Uni New York y a firma na september 2015 e agenda 2030. E tempo ey nos minister president tambe a compañ’e. Nos prome minister e tempo ey a trece ex-candidato presidencial Al Gore Aruba.

Energia sostenibel ta puro gañamento y fantasia. Diripiente Parlamento di Union Europeo a pasa un ley cu ta declara cu energia nuclear ta energia berde. Esaki ta pa nan convenencia. E metanan di desaroyo sostenibel, cual ta 17 punto,cu ta hinca den agenda 2030, un luz mester sende y mira den ki direccion gobierno kier bay pa goberna mundo den e asina yama “New World Order”. Den biblia ta para cu e anticristo lo goberna e mundo un dia. E bon noticia ta cu esaki no ta su tempo ainda. Un bon cristian mester haci todo por todo pa no wordo manipula pa gobernantenan sin escrupulo.

Nos mester realisa cu covid-19 a bin ta benta economia mundial abao pa asina esunnan cu mente maligno realisa nan agenda caminda tur hende lo no tin nada mas di bisa. Esaki ta e agenda socialista/comunista pa destrui bo pais y yega na poder pa NAN si por biba manera un rey. Pueblo nos ta mirando esaki ta tumando luga riba nos propio isla? Unda nos bira nos ta mira decadencia ta tuma luga. Mira Venezuela con e pueblo a wordo engaña pa un partido socialista di siglo 21 y a hiba e pais di mas rico den nos region den e pais mas pober den nos region. E agenda 2030 ta pa tin poder mundialmente y pesey na lema ta: Lo bo tin nada y lo bo ta feliz.

E medionan di comunicacion no ta pasa ningun di e noticianan aki paso nan ta cumpra pa esunnan tras di cortina cu ta pone politiconan balia riba nan ritmo. Aruba no a keda atras den esaki sino pa añas nan a manipula y engaña nos pueblo di Aruba y di tur e cosnan aki ta pa cierto grupito tin beneficio. Rond mundo pueblonan a lanta for di soño y ta bringa contra di gobiernonan cu kier ehecuta e agenda 2030.

Den mesun agenda aki ta para habri frontera pa stranhero pa e pais perde su stabilidad y ta mas facil pa gobierno keda na poder paso lo no tin resistencia mas. Esaki ta e meta di Hulanda cu e 6 islanan den Caribe. Nan tin 3 isla caba bao di nan poder y falta St Maarten, Curacao y Aruba.

Esaki ta e tempo pa crea un fundeshi solido. Pa hopi aña nos pueblo a wordo engaña cu promesanan falso durante di campaña. Awe nos pueblo por mira con e lobonan aki bisti di carne a destrui nos Aruba dushi tera cu medida tras di medida. Nos a drenta augustus cu aumento di prijs di awa y electricidad. Mal maneho di nos gobierno cu no a hedge ora prijs riba bari di petroleo abao. E director di WEB NV saliente a pidi pa gobierno hedge for di aña pasa pa no hinca WEB NV den problema financiero. Gobierno no a permiti WEB NV hedge. Awe nos planta cu ta produci awa y electricidad ta den problema financiero y e reserva di 150 mil florin disparce. Riba dje WEB NV tin un debe di casi un biyon florin. WEB NV a hañe cu lomba contra muraya y no a keda nada otro cu aumenta e prijs riba awa y electricidad. Nos tin un Parlamento cu no ta funciona paso nan no ta controla nan gobierno.

Pueblo di Aruba pa hopi aña a vota pa partidonan politico cu a priminti cielo y tera durante campaña. Awe nos isla ta den un debe financiero biyonario y esaki ta danki na partidonan tradicional. Ta basta cu partidonan tradicional. Esaki ta tempo pa nos actua.

LEAVE A REPLY

Please enter your comment!
Please enter your name here