Royal Caribbean Group y Carnival Group lo continua cu nan cruceronan e berano aki, a pesar di dos caso di Covid-19 detecta abordo di Celebrity Millenium, segun un relato di noticiero online, Curaçao Chronicle.
Segun Curaçao Chronicle, despues cu varios crucero tabata anfitrion di brotenan mayor di Covid-19, y cu cantidad grandi di Mericanonan awo vacuna, lineanan crucero ta luchando pa reanuda nan negoshi. Accionnan di Royal Caribbean, Carnival Corp y Norwegian Cruise Line Holdings Ltd, cu tur a registra perdidanan mayor aña pasa mientras restriccionnan a hiba e industria na un paro, a cay entre 1% y 2% despues di e testnan positivo.
Royal Caribbean a nenga di duna mas detaye riba e pasaheronan cu a test positivo of e circunstancianan di nan contagio, ora cu Reuters a puntra diabierna.
Celebrity Cruises despues a bisa cu tabata pagando pa ambos pasahero bula back cas di forma priva diasabra, y tin plan pa desembarca e resto di e pasaheronan na tempo despues di haci test.
Un fuente cercano na Carnival, cu a nenga di wordo nombra, a bisa cu e compania tambe ta bayendo dilanti cu e cruceronan planea pa berano.
E operador, un di e prome na Nort America pa reanuda operacion a base di test, a bisa diahuebs ultimo cu e individuo tabata asintomatico, den isolacion y siendo monitorea pa dokter. Celebrity tambe tabata haciendo contact tracing y agilisando test pa tur contacto cercano.
Blogger di industria di crucero, Ashley Kosciolek a skirbi riba su blog cu diahuebs a bis’e cu e pasaheronan infecta tabata riba su excursion na Barbados dos dia prome. A pidie pa keda den su camber pa alrededor di cuatro ora te cu su test a sali negativo. Su post a mustra cu e crucero tambe a stop na Aruba y Corsou.
CDC Mericano a bisa cu no ta posibel pa crucero ta un actividad di cero riesgo ya cu semper lo presenta un riesgo di transmision, agregando cu ta comprometi pa sigura cu operacionnan di crucero ta conduci di forma safe.
Lineanan crucero ta den negociacion cu Florida, for di unda algun barco lo sali, despues cu gobernador di e estado a pusha contra pone hende mustra prueba di vacunacion. Biahenan ta programa pa cuminsa juni of juli, nabegando Caribe, Riviera Mexicano, y Alaska.
Experto di crucero, Stewart Chiron, kende ta abordo di Celebrity Millenium, a bisa Reuters cu bida abordo riba diahuebs anochi a bay segun plan, cu cena, show y entretenimento anochi. El a bisa cu niun hende abordo tabata bisti tapaboca, segun e relato di Curaçao Chronicle ta conclui.
