Den e dia nan aki prensa ta yen cu e noticia cu e vacuna porfin a yega y ta cuminsa vacuna nos poblacion.

Te awor nos a core y sconde pa e virus via Shelter in place, Toque de Queda y distanciamento fisico. Awor a yega e momento pa nos bay guera cun’e.

Mester wordo bisa cu e vacuna ta algo boluntario. Cada ken ta dicidi pa su mes si e ta tume of no. Tur dos decision tin su riesgo y incertidumbre. Den tur dos caso nos ta desea tur hende suerte y bendicion di Dios.

Ami, Ling Wong, a dicidi di tum’e. Mi tin hopi motibo pero mi ta menciona solamente un par.

Nos economia mester lanta bek. Esaki no por si e pandemia no ta bou control. E turista lo no bolbe manera antes. Hende ta sigui perde trabou. Dos dia pasa un señora a bisa mi cu el a perde trabou na aeropuerto. Hende ta cuminsa pidi placa ariba caya pa nan por come. Den parking lot un señora grandi a acerca mi pa 10 florin pa e cumpra algo di come. Mi a dun’e pasobra mientras mi por lo mi comparti y ta solidario.

E asunto aki tin urgencia pasobra e placa di ayudo di Hulanda no ta pa semper. Nos mester lanta para ariba nos mesun pia atrobe.

Otro urgencia ta cu mas largo e virus ta eyfo mas variante nos lo haya. Un momento dado e vacuna nan cu nos tin awor lo no traha pa e variante nobo nan. Nos mester bay bek pa ahusta e vacuna of busca vacuna nobo.

E ultimo motibo cu mi tin ta personal. Mi kier por yega y brasa y primi mi nieto nan sin e miedo cu mi lo afecta nan cu e virus. Dios libra cu mi mester perde un di nan pa via di e malesa aki.

Ora mi beurt yega pa vacuna mi lo bay para mas dilanti den rij pa mi tum’e.

Mi pregunta ta ken ta join mi pa nos pone Aruba ariba pia atrobe.

LEAVE A REPLY

Please enter your comment!
Please enter your name here