13EntrevistaLisetteGomes.jpg

Lisette Gomes di Fundacion Lisette Gomes ya a reuni cu minister y Parlamento riba e carta di manifestacion cu nan a entrega fin di luna pasa. E ta splica con esakinan a bay.

“Nos a wordo yama door di Minister Dowers e mesun dia cu nos a entrega e manifiesto, pues 27 di april. Minister a pidi pa sinta cu nos y esaki a sosode dialuna 9 di mei.” Sra. Gomes a bisa cu a bay e reunion aki pa bay over di e manifiesto y e puntonan cu a pone riba papel. Ora cu a yega tabatin presente, un representante di Voogdijraad y Hoofd Officier di Ministerio Publico. nos no tabata sa cu nan lo ta bay ta presente, esaki tabata un bon sorpresa pasobra nos por a haci algo pregunta y sali for di algun duda cu tabatin, el a bisa.

 

El a sigui bisa: “Manera cu tur hende sa, ultimo tempo Voogdijraad tabata ricibi hopi critica. Tambe Ministerio Publico, den e parti di fiscal nan cu ta pidi castigonan abou. Pues ta asina cu nos a haya splicacion di Voogdijraad cu nan ta onderbezet, pues cu falta personal. Minister Dowers a bisa cu nan ta trahando riba esaki pa basta tempo caba, pues esaki ta laga nos sinti cu ta pa falta di placa esaki no a sosode ainda, pasobra no ta mira ningun otro motibo.”

 

El a sigui splica cu Hoofd Officier a splica mas o menos con nan ta mira e casonan y e diferente pruebanan entre otro, y a sigui haci pregunta manera kico ta pruebanan pisa pa un fiscal dicidi cu ta bay persigui e persona. El a duna un splicacion mas o menos, pasobra e no por papia den nomber di fiscal nan pasobra cada persona ta wak un caso diferente manera. “ e ora ey mi a presente cu un caso cu mi tin basta tempo riba dje, cual un denuncia a wordo entrega na juli 2012, y despues di un aña y un luna, KZP a entrega e papelnan hunto cu rapportnan y proces-verbaal na Ministerio Publico. Y despues Ministerio Publico ta manda un carta na e mayornan bisando nan cu nan no ta bay persigui e mayornan den e caso aki, pa falta di prueba. Siendo cu tin rapport pisa di verkrachting, pues tabatin penetracion, y asina mes esey no tabata suficiente. Mi a dun’e copia di e papelnan pa wak si e por revisa esakinan. El a conseha cu por bay Hof den e caso aki, pa asina dicidi kico ta bay haci cu e caso, pa wak si por habri e caso y haci mas investigacion pa interoga e abusado den e caso aki, pa wak si ta yega na un sentencia.” Pa loke ta Minister Dowers, a hacie preguntanan di entre otro, KZP cu ta onderbezet aunke  cu e no a acepta esaki. El a bisa cu e ta suficiente personal y cu nan a haya estudio referente video verhoor. Nan ta basa nan mes hopi biaha a base di cifra di corte entre otro cual en berdad no ta asina halto como cu tin casonan cu no ta yega corte. “E ta tiki dificil di ambos banda pa acepta cosnan tin biaha, pero esey ta e problema grandi cu tin na Aruba, pues cu no tin cifra. Y si tin cifra mes, nan ta diferente cifra di diferente departamento. Ta p’esey nos ta pone presion pa asina Parlamento y Gobierno por move riba e protocol cual ta pone un liña stret pa tur hende sa unda bo mester yega prome y kico ta sosode despues cu yega na e  dicho luga eynan.”

Sra. Gomes a bisa cu lo keda pendiente pa un reunion publico, dia nos a bay Parlamento tabata dia 3 di e luna aki, y asina nan a priminti cu lo pidi un reunion publico pa e ministernan en cuestion t’ey pa nan haci nan preguntanan y tambe pa nan bisa kico nan plannan ta bay ta. Pa loke ta e reunion aki cu a tuma luga dia 3 cu Parlamento, tampoco no tabata satisfecho como no a haya plan cla, mas tanto nan a duna splicacion di kico nan ta bezig cu ne. cual ta cosnan cu tabata andando desde 6 aña pasa, cu no a mira solucion ainda. P’esey a bisa nan tambe cu lo bay keda riba nan haciendo pregunta y mandando carta, pa asina yega na un solucion y pa nan pone e problematica aki como prioridad, Sra. Gomes a conclui.

LEAVE A REPLY

Please enter your comment!
Please enter your name here