E evento pa recauda fondo pa Lissethe de la Hoz a bay bon ultimo siman, cu hopi sosten di comunidad. Sra. De La Hoz ta mester di 150.000 florin pa tratamento medico despues cu el bira victima di un accidente di gokart na Bushiri Karting.
Bon Dia Aruba a skribi over di su caso unda por atrobe cu nos seguro nacional AZV no ta cubri tur e gastonan. Cu bendemento di cuminda, bebida y wega mucha nan a purba di haya fondo diadomingo pasa. Cuanto nan a recauda no ta conoci ainda.
Sra. De La Hoz mester di 8 diferente tratamento pa drecha e cuero di su cabes y cabey. Entre otro ta trata cu operacion kisular, inherto di cuero, tratamento di transplante pa cuero di cabey y plantacion di folicuo di cuero. Sra. De La Hoz tin planea di bay Colombia pa su prome operacion den augustus, y cada operacion tin 2 luna di recuperacion cu ta necesario.
Despues di un accidente na Bushiri Karting na 2015 unda cu e cabey di sra. De La Hoz a keda pega den motor di un gokart, e compania no kier a aporta fondo pa yuda mehora su salud. Sra. De La Hoz ta conta cu a acudi ayudo cerca AZV pa su operacionnan necesario, y AZV a sigura un tratamento di camara hiperbarico cu a tuma luga na Bonaire. Pero no tabata posibel pa ofrece mas ayudo ya cu e resto di e tratamento ta cirugia plastico y esaki no ta wordo cubri door di AZV.
Sinembargo sra. De la Hoz ta gradici na AZV pa a brinda ayudo, aunke e tabata limita. “Ora mi a haya noticia cu AZV no por brinda mi mas apoyo, mi no kier a tene un actitud di bay keha cerca nan pasobra mi merece miho. Of pasobra mi ta paga impuesto y seguro. Si no pa bin cu solucion concreto pa mi mes y bin na manera mas independiente pa recauda fondo pa por mehora mi salud.”
Despues di a warda asina hopi tempo pa algun contribucion di instancianan y Bushiri Karting cu segun e mester para responsabel, sra. De La Hoz a dicidi di tuma su mesun iniciativa. E ta hopi gradici pa tur e sosten cu pueblo a brind’e den e momentonan dificil aki.
“Mi ta pidi algo chikito pa por aporta na mi salud, si hopi hende djis contribui 5 florin, cada un e ta di gran ayudo. Tambe keda pendiente pa otro eventonan cu mi lo organisa pa recauda fondo.”
