ORANJESTAD – Stichting voor Verstandelijk Gehandicapten Aruba (SVGA) tabata tin un atardi informativo siman pasa unda a subraya entre otro cu hopi hende handicap ta wardando pa un cas pa basta tempo caba. Directora Else van Homelen ta splica nos cu e lista aki ta bay bira mas largo cu 99 persona. Tin 99 persona handicap cu SVGA tin registra cu ta wardando pa un cas. Sin embargo tin otro fundacionnan cu tambe tin lista y esakinan no ta poni hunto ainda. “Esaki ta bira nos siguiente paso. Na augustus nos tin un fecha planifica caba pa wak e listanan y mi ta kere esaki ta bay bira mas grandi”, segun sra. Van Homelen. Mester wak si tin hende cu ta registra na varios fundacion etc. cual por aparece dobel.

Proyectonan incompleto
Sra. Homelen ta subraya cu e problema aki ta uno di hopi aña caba.
Prome cu e mes a bay traha na e fundacion aki tabata tin varios proyecto caba cu a wordo entrega na gobiernonan anterior, cu nunca a keda cla pa traha extra cas pa hende bay biba. Sra. van Homelen: “Ora cu ami a bin, mi a traha un projectdossier anto Marisol Lopez Tromp tabata minister encarga e tempo ey. El a tuma iniciativa pa wak kico por haci hunto cu SABA. A traha un edificio cu te awe no tin nos hendenan aden. Despues minister Michelle Hooyboer a pidi pa traha un otro proyecto pa bin cu un cas na nos tereno mes cu tampoco a bay door.”
Pues e problema ta sigui wordo menciona aki aya pero te awe no tin placa dispuesto ainda pa yuda, segun nos ta compronde for di sra. van Homelen.

Parti social ta keda un problema
E fundacion tin cuater diferente luga pa hende por haya servicio di pasadia. Nan tin un scol, pasadia Bibito Pin pa muchanan, pasadia Bril di Solo pa hende adulto y beleidingcentrum Man Na Obra. “Pa nan nos tin un lista di spera, un total di 36 persona. Ora muchanan sali for di pasadia cu nan ta aden, ta bira dificil pa pasa nan na e departamento di adulto pasobra no tin luga tampoco. Na aña 2000 por ehempel, nan tabata tin 40 alumno na nan scol, aworaki tin 63. Na e scol no tin e problema cu nos no ta haya extra personal. Na 2018 nos lo haya extra hende pa mehora e cuido; orthopedagoog etc.. Pero ta e parti social ta e problema cu for di tempo cu mi a bin traha akinan no a bin ningun guia extra”, sra. van Homelen ta bisa.
E no ta logico segun e directora pasobra e sociedad ta crece, mas hende ta bibando na Aruba, pues esey di su mes ta causa cu nan tin mas cliente.
Un tema hopi scondi
“E problema di e famianan no ta wordo mira den comunidad. Un mucha den un rolstoel ta hopi dificil bo hiba dilanti Bestuurskantoor pa mustra cu mester cuido. E ta un problema hopi scondi.” Por ehempel un adicto ambulante segun e directora, bo ta wak e riba caya anto hende ta haya molester di nan. Pero un persona cu tin multiple handicap, e ta na cas, e mayor no por move pasobra no tin transport y ningun hende ta wak e problema. ”
“P’esey nos ta pidi un tiki atencion riba esaki. Nos ta purba trece e problema hopi biaha cerca e ministernan pero te ainda e parti aki no a haya mucho prioridad. Mi sa cu pais Aruba tin un pot so cu bo mester parti, pero esaki ta algo cu mester atencion.” E directora ta conclui cu e ta kere cu tin solucion. Por ta den un of otro manera haci cu e pot ta subi y/of tur hende ta coopera cu algo. “Nos tur tin un wela, un mama, un ruman, un yiu cu mester un cuido special. Y nos tur mester compronde cu mester aporta cu algo pa esaki bira posibel ami ta haya.”