Diabierna ultimo, durante e accion di e grupo ‘Maestronan Preocupa’ a bira evidente cu nan no kier papia mas directamente cu e minister encarga cu enseñansa, Rudy Lampe.

Prome Minister encarga cu asunto general, Evelyn Wever-Croes a bira e brug di comunicacion pa haya un solucion na e preocupacionnan cu e docentenan a expresa den e manifiesto entrega na su persona y na Presidente di Parlamento, Ady Thijsen.

E docente Soraya Waterham, kende a entrega e manifiesto den nomber di e grupo menciona, a bisa cu nan tin un desconfiansa masha grandi mes den ‘Minister Lampe su no maneho’. El a agrega cu e ta un maneho ‘ad hoc’ y e lista di nan preocupacion tur dia ta birando mas largo. P’esey nan a dicidi di bati e porta di Parlamento, ya cu e ta haya cu nan por entrega un mocion di desconfiansa contra e mandatario encarga cu enseñansa.

Durante e accion di e maestronan aki, nan a grita pa Lampe baha, pero tambe nan a grita pa respet. Waterham a expresa cu e maestronan ta rabia y poco poco e grupo ta birando mas grandi, ya cu enseñansa ta un pilar den nos comunidad. P’esey unabes cu nan a entrega e manifiesto na gobierno y na Parlamento, nan lo keda pendiente di un contesta.

 

 

 

LEAVE A REPLY

Please enter your comment!
Please enter your name here