E Arubiano y empresario emprendedor, Raymond Slagt kende ta doño y Director di e compania Ray’s Water, a expresa su preocupacion tocante e Sugar Tax cu gobierno tin pensa di introduci den cuadro di su reforma fiscal, pa genera mas entrada den caha di gobierno pa atende cu nan gastonan.

Ray’s Water ta un compania chikito cu Slagt a lanta cu su propio man y sacrificio 25 aña pasa. E compania aki, no solamente ta su orguyo, su fuente di trabou, sino su baby cu e ta wak menasa di morto cu e Sugar Tax. Aunke nan ta bende awa, tambe nan ta produci bebidanan manera juice y otro productonan cu ta contene sucu pa nan cliente principal.

P’esey e ta haya cu si gobierno ta introduci e mal famoso Sugar Tax, e medida aki ta bira practicamente e guillotina riba e nek di su negoshi. Un negoshi cu actualmente a bira e pan pa 6 trahado. Pa e motibo aki, aunke e no tabatin un manifiesto pa entrega, Slagt a mustra su solidaridad cu e accion di trahadonan di Meta Corp, entre nan di Tropical Bottling Company- cu a tuma luga diabierna ultimo dilanti di Parlamento.

Aunke gobierno a yega di informa cu ainda no a cay un decision definitivo si lo introduci Sugar Tax of no, e kier expresa su preocupacion, ya cu e belasting aki ta pone den peliger no solamente existencia di su compania, pero e pan di su empleadonan tambe.

E ta haya cu si nan ta bin -manera gobierno tin planifica- pone 220 florin pa caha di bag and box, esaki ta pone financieramente su empresa den problema. Ya cu e tin cu paga entre 140 pa 200 mil florin pa luna den Sugar Tax cu su compania no ta bende, y dificilmente nan no por cubri e gasto aki na belasting.

El a yega di canalisa e preocupacion via Camara di Comercio (KvK). Den un ‘Town Hall Meeting’, Slagt a presenta su preocupacion cerca e gremio comercial aki. Considerando cu Ray’s Water ta un compania chikito, podise cu pa gobierno no ta atractivo pa sinta papia cu nan.

“Mi a bisa nan cu si e cos aki ta continua, dia 1 di januari nos ta cera nos planta”, el a declara na e matutino aki. Pero no solamente cera nan planta, sino manda nan personal cas pasobra lamentablemente nan no por paga e Sugar Tax.

Segun Slagt, e asunto di Sugar Tax no ta cuestion cu nan kier haci fastioso cu gobierno, sino cu nan prioridad ta uno strictamente comercial, y absolutamente no politico.

LEAVE A REPLY

Please enter your comment!
Please enter your name here