Mama di Natalee Holloway ta enfrenta autoridadnan na Aruba; Mama di adolescente desapareci ta bolbe Aruba cu Nancy Grace den special pa Fox Nation

Recientemente, riba pagina di internet di Fox News a aparece materialnan promocional pa un programa special di e seccion Fox Nation cu anfitrion y ‘experto di crimen’, Nancy Grace. Den esaki, mama di Natalee Holloway, Beth, ta bolbe Aruba pa confronta autoridadnan.

E confrontacion ta desenvolve den e di tres episodio di ‘A Natalee Holloway Investigation with Nancy Grace’ pa Fox Nation, “mientras Grace, Beth Holloway y director di Cold Case Investigative Research Institute, Sheryl McCollum ta repasa e ultimo oranan den cual a mira Natalee cu bida, y ta detaya kico mayornan mester haci pa ta prepara pa lo pio na momento cu ta manda nan yiunan den exterior”, segun e material promocional ta indica.

“Mi a hura cu nunca mas mi lo bolbe Aruba” Grace ta bisa despues di su yegada na e isla. “Mi por mira con chikito e ta. Nan mester a resolve esaki [red. e desaparicion di Holloway] den literalmente 24 ora.”

E personal di e programa ta reuni pafo di Holiday Inn cu camaranan rodando na momento cu polis di Aruba ta yega na e escena, segun e programa, ‘acusando e personal di no tin derecho pa ta eynan, y menasando cu aresto’. “Autoridadnan ta continua sigui Grace y su tripulacion mientras nan ta core rond di e isla bishitando e ultimo sitionan conoci unda Natalee a bay”, segun e relato. “Ta cla cu nos no ta bon bini”, Grace ta bisa dramaticamente, describiendo doñonan di tienda cu ‘a cera porta na nan cara’.

“Ora bo ta buscando husticia, bo no ta buscando pa amigo”, Holloway ta insisti.

Pa finalisa, Grace ta comenta cu e ‘e isla aki no a haci un solo cos’ desde desaparicion di Holloway. “Niun ordenansa nacional, niun ley, nada, ni regla pa casino of bar, nada. Ainda e ta sucediendo. Nan no a haci nada” e ta comenta. “Mi no ta kere cu gobierno di Aruba ta worry en absoluto. Si nan tabata worry, nan no lo a djis menasa di aresta nos”, McCollum ta añadi.