Siman pasa, den medionan di comunicacion local a circula e noticia di e contract laboral colectivo (CAO) nobo pa trahadornan di Hospital Dr. Horacio Oduber. Un aspecto den e CAO a hala hopi atencion den comunidad: Trahadornan lo bira e prome den sector publico na Aruba pa pasa pa traha 36 ora pa siman en bes di 45.
E CAO actual di trahadornan (sindicato ABV) di HOH ta caduca fin di aña, y pa e motibo aki ta den proceso di negociacion pa e CAO nobo cu mester drenta na vigor dia 1 di januari proximo. Medionan local a reporta cu tin diferente punto cu ya ta acorda, entre cual, ta bay reduci e siman laboral di 45 ora pa 36 ora di trabao. Intencion ta pa e cambio aki cuminsa di dia 1 di juli 2026.
E noticia aki a hala hopi atencion den comunidad local, y usuarionan riba rednan social a expresa diferente preocupacion. R.A.G. a cuestiona: “Cu mesun salario? Anos den sector priva cu ta paga pa tur cos, foei.”
R.M. a expresa preocupacion pa nevenwerk, bisando cu “pa no hisa salario ta cu placer ta baha e oranan y hinca low labor part-timer. Y nan ta bay traha otro caminda yega mas cansa.”
Sinembargo, S.J.M a nota cu e ta un desaroyo positivo, pasobra “a ser constata cu traha menos ora y studia menos ora e trabao of estudio ta mas productivo.” Di su banda, J.R.A. a nota cu ya ta di hopi tempo e boticanan ta usa e sistema di 36 ora pa siman, cu dos ploeg pa yena e orario cu e botica ta habri. “Na nos Botica tin 36 ora 25 aña caba,” el a comenta.
Teniendo cuenta cu e preocupacionnan entre comunidad, Bon Dia Aruba a tuma contacto cu manager di marketing y comunicacion di HOH, Charlaine Huntington pa pidi claridad tocante kico precies e terminonan di e CAO nobo ta nifica.
Pa di prome, Huntington ta enfatisa cu “mester corda cu e CAO ainda no a wordo finalisa, pues ta den proceso ainda.” Loke ta circulando den medionan actualmente “ta un idea” presenta pa e comision di CAO y sindicato ABV, “pero e proceso di firmamento y claro akkoord di nos Hunta di Supervision no a sucede ainda, pues tur e puntonan ta ideanan y nos ta spera cu pronto por finalisa.”
Contestando si e 36 ora pa siman ta nifica cu lo traha 4 dia, 9 ora pa siman, Huntington a bisa cu “cada departamento lo tin e posibilidad pa scoge den ki manera e ta sali miho pa por duna forma na e 36 ora pa siman.” El a agrega cu “locual si ta importante ta cu cada departamento mester tin un standard pa full e departamento. Esaki den cuadro di planning di cada departamento.”
Huntington a splica cu motibo cu a bin cu e idea pa baha e cantidad di ora di 45 pa 36 ora pa siman, ta pasobra ta reconoce e importancia di balansa entre trabao y bida personal. “Hospital ta kere den un work-life balance,” el a splica. Na comienso di aña, HOH a haci un encuesta, y den esaki, un di e puntonan cu mas a resalta tabata e balans entre trabao y bida priva. “Y tambe nos como HOH kier sigui e mesun trend cu tin na hopi parti di mundo caminda traha 36 ora a demostra cu ta trece cune work-life balance y alabes coleganan mas involucra y mas productivo.”
Mientras cu e idea di HOH ta pa e trahadornan tin mas espacio pa nan bida priva – cu ta nifica mas descanso, tempo cu famia, hobbies, etc. – tin e preocupacion si e trahadornan realmente lo yena nan oranan liber adicional cu mas trabao na banda, loke na Aruba ta conoci como nevenwerk. Esaki por resulta den trahadornan mas cansa y menos dedica na nan trabao original. Sinembargo, segun Huntington, “actualmente no tin e preocupacion ey.” Pero e ta menciona si e hecho cu na Aruba, ambtenaarnan no por djis haci nevenwerk sin mas. “Si dado caso e colega ta desea di haci esaki, e lo mester sigui e procedura cu nos tin na HOH pa pidi permiso pa por haci nevenwerkzaamheden.”
Algo cu pa hopi tempo ta un preocupacion y un problema na Aruba ta e falta di personal den sector di cuido di salud. Un factor cu ta keda menciona cada biaha ta e hecho cu e salario y condicionnan laboral na Aruba no ta mucho atractivo pa personal di calidad halto. Talbes e idea di un miho work-life balance lo por contribui pa mehora e situacion?
“Mirando cu e suma anual cu nos ta ricibi pa paga salario di personal no ta competitivo riba mercado local y tampoco den region, a opta pa enfoca riba mehora e beneficionan secundario cu enfoke riba miho work-life balance y tambe miho beneficio secundario cu no tin directamente un impacto financiero,” Huntington a splica. “Esaki ta responde riba e necesidadnan di nos personal actual y sperando cu asina tambe nos por atrae mas profesional local y den region cu e beneficionan nobo aki.”
Finalmente, entre tur comentario riba rednan social, un persona a indica cu entre e acuerdonan ta inclui cu edad pa traha nachtdienst lo subi na 60 aña. “Esaki no ta corecto,” Huntington a aclaria. “Anteriormente un colega cu tin 60 aña di edad, ainda lo por a wordo planea pa nachtdienst te cu maximo di tres biaha pa luna. Den e CAO nobo unabes firma cu lo bay na vigor januari 2026, esaki no lo ta e caso mas, solamente si e colega mes ta desea esaki.”
