parlamento gobernador.jpg

Mientras Prome Minister Mike Eman a contesta preguntanan ayera den parlamento di Aruba, minister di Asuntonan di Reino Ronald Plasterk a contesta na escrito preguntanan di parlamento Hulandes. Y por conclui cu ainda tin un diferencia di opinion riba e nombramento di e gobernador nobo.

 

Nos Prome Minister ta keda para riba e punto cu Hulanda/Reino no a actua corecto. Mester sinta un precedente pa futuro di nos relacion den Reino Hulandes. “E ta imposibel pa bo acepta, los di e persona cu gobierno Hulandes a bisa bo: No, esun aki bo tin cu bay cu ne”, e ta señala. “Acepta algo asina ta atenta contra autonomia di nos pais.”

 

Si otro banda minister Plasterk den su contestanan riba pregunta di e parlamentario di CDA Mustafa Amhaouch ta bisa e decision a bay den un forma legitimo. Y ta mustra bon cla den e contestanan cu e candidatonan di Aruba no lo por conta riba sosten den e Conseho di Minister di Reino, ni ora e di dos termino di e gobernador actual a caba. Na e momento ey, basicamente a resta un candidato faborito di parti di Aruba, esta e minister di Financia Angel Bermudez. Pero e Conseho di Minister di Reino te ainda no a mustra cu lo bay duna sosten. Y pa motibo di esey nan mes a propone nan candidato, esta Alfonso Boekhoudt.

 

Reunion

E reunion ayera den Staten a tuma luga riba peticion di e fraccion di AVP, e partido den gobierno. Lider di fraccion di AVP, Rene Herdé kende a argumenta cu nan a pidi e reunion aki pasobra nos ta un pais cu ta basa su decision riba ley, areglonan y palabracionnan legal. P’esey na momento cu nan ta constata cu cualkier ciudadano of gobierno no sigui e regla palabra, nan tin como Parlamento e responsabilidad di actua pa corigi. “Pasobra violacion di ley, falta di respet y incumplimento cu ley un caminda ta crea un precedente pa incumplimento otro caminda.”

Tambe di e miembro independiente di Parlamento drs. Marisol Lopez-Tromp a bin cu un serie di cinco den e reunion aki.

 

Incidente y Statuut

Minister President a papia riba  varios ‘impasse’ di e mesun caliber cu a yega di sosode den pasado relaciona cu e nombramento di un Gobernador nobo. Incidente cu ta data te hasta di aña di 1969 tempo cu Aruba tabata forma parti di e constelacion Antiano; y casonan mas reciente manera na aña 2003 epoca di gabinete Nelson Oduber, tempo cu Gobernador actual  a keda nombra den e funcion aki.

 

El a referi riba e acuerdo of palabracion haci na 2001 pa loke ta e procedura pa postula e candidatonan pa bira Gobernador. El a bisa cu pais Aruba tin un derecho autonomo pa propone nan candidatonan pa bira Gobernador; y el a sugeri pa e fraccionnan no saca probecho politico di e situacion cu a surgi actualmente.  Despues el a bay den detayenan cu ya ta conoci momento cu e carta pa Prome Minister di Hulanda a lek y publico por lesa e argumentonan di gabinete Eman.

 

‘No a nenga pa su edad’

E Prome Minister ta keda para riba e lista di e 3 candidato cu parlamento tambe a haya.

MEP no tabata di acuerdo cu niun di e tres, segun sr. Eman, y nan a sugeri un candidato di nan den nomber di ex minister Nilo Swaen; mientras cu PDR a bay di acuerdo cu e di dos candidato. Premier Eman a bisa cu no a bin niun obhecion di parti di Hulanda riba e cualidadnan di minister Bermudez, independiente di su edad. Pero Sr. Bermudez cu ainda ta un persona vital a laga sa cu si ta wordo honra den e funcion aki, e lo bay pa un periodo so di 6 aña.

 

Premier Eman a bisa cu pa hopi rato e candidato di pais Aruba tabata hopi cla. Sr. Bermudez den e caso aki y di parti di Hulanda casi pareu cu e candidato di pais Aruba a bisa cu nan kier Minister Plenipotenciario na Hulanda pa e posicion di Gobernador y nan a argumenta cu nan tin hopi confiansa y nan ta conoce pa varios aña caba. “Ni kico nos a bisa pa haci cu e candidato mester ta esun proponi door di gobierno. Nos no kier discuti personalidad di kende Hulanda kier bin cu ne.”

 

Etica

Parti etico di e forma con e ex Minister Plenipotenciario a acepta, tambe a wordo menciona den e reunion den Parlamento. Premier a puntra su mes si ta etico cu un gobierno ta bay cu un persona cu a wordo nomina den un posicion p.e. den Conseho di Reino y cu e gobierno di Hulanda of di Reino ta bay ofrece e mesun persona aki un funcion, mientras cu e ta eynan eherciendo un funcion pa otro pais den Reino.

 

E ta consciente cu den Conseho di Reino no semper e interesnan di e pais miembro no ta core paralelo. Den e caso aki e presencia di un Minister Plenipotenciario di Aruba na Hulanda ta esencial pa hiba e debate y dialogo aki. “Y bo por puntra bo mes si ta corecto cu e persona cu ta representa bo eynan ta wordo ofreci cierto funcionnan, mientras cu e t’ey pa representa bo.”

Encuanto e pregunta si Sr. Boekhoudt ta un bon candidato pa asumi e posicion di Gobernador, Premier Eman a bisa cu den e caso aki “pa nos ta e principio cu Gobierno di Aruba ta propone un candidato”. E ta haya cu den e situacion cu a surgi ta importante pa nan por eleva riba e “politikeria” y mira e esencia di e caso aki.  

 

Caso civil

Sr. Eman a bisa un biaha mas cu apesar di e impase cu a surgi, nan a opta pa no sigui cu un controversia cu e Conseho di Reino riba e tema aki. Nan a evalua e posibilidad of no di entabla un caso civil cu lo bira algo sui generis y hopi dificil riba un caso di materia Constitucional, e ta menciona ayera tambe

Esaki debi cu no tin un instancia imparcial pa atende caso di conflicto asina. Pero manera conoci finalmente despues cu sr. Eman a bay Hulanda pa papia cu minister Plasterk, aunke a pidi pa sinta cu Prome Minister di Hulanda Mark Rutte, nan a dicidi di laga e asunto manera e ta. 

LEAVE A REPLY

Please enter your comment!
Please enter your name here