Pa un isla rondona y forma pa lama, pa compronde Aruba su identidad y herencia, nos tambe mester compronde kico tin bao di awa. Awo a surgi un oportunidad importante. Investigadornan como hende local por mira bao awa na un escala cu antes no tabata posibel.
E parti central di e expedicion di Herencia Cultural Bao Awa ta RV Hydra, un boto di investigacion di 56 meter opera pa Inkfish, un organisacion filantropico cu ta dedica na expande conocemento cientifico di lama y ta beneficia publico cu su investigacionnan. E expedicion aki ta totalmente subsidia pa Inkfish, creando un oportunidad significativo pa Aruba por haya acceso na infrastructura specialisa pa investigacion, tecnologia y experticio.
E trabao ta sigui e principionan di e Convenio di UNESCO 2001 pa Proteccion di Herencia Cultural Bao Awa, cual ta encurasha paisnan pa proteha su herencia bao awa, pa evita di saca obhetonan innecesariamente y pa traha hunto den investigacion, capacitacion y intercambia conocemento. Pa mas cu dos decada ta desaroyando investigacionnan den Aruba su Herencia Cultural Bao Awa. Na 1999 arkeologo Raymundo Dijkhoff di Museo Arqueologico Nacional Aruba (MANA) a cuminsa traha rednan cientifico, colecta informacion y explora acercamentonan pa proteha sitionan bao awa.
Na 2011, un inventario inicial di Aruba su herencia cultural bao awa a cuminsa, sigui pa mas investigacionnan, actividadnan pa crea conscientisacion y colaboracion internacional. Na 2019, a entrega un peticion formal di Aruba, Corsou y St. Maarten na Hulanda pa ratifica e Convenio di UNESCO 2001. E ratificacion ta planea pa tuma luga den e proximo añanan. P’esey, e proyecto cu Inkfish ta representa e siguiente paso den investigacion di Herencia Cultural Bao Awa pa Aruba despues di un trayectorio di 20 aña.
E strea di e expedicion aki ta un ‘multi-beam sonar’ cu por traha mapa di e fondo di lama te cu 2500 meter profundo, door di manda ‘soundwaves’ pa e fondo y door di uza e signal cu ta bin bek pa crea mapanan tridimencional. E meta ta pa traha mapa di mas cu ta posibel y mehora e conocemento di tanto sitionan conoci y no conoci di herencia cultural bao awa rond di Aruba. RV Hydra tambe ta carga dos submarino chikito pa investigacion cu ta capabel di opera te cu 1,000 meter. E boto di apoyo, Skye, lo yuda traha mapa di fondo di lama y sostene operacionnan di sambuyamento, mientras cu Hydra mes ta contene dos laboratorio pa procesa muestranan y informacion cientifico durante e expedicion.
E investigacion no ta limita pa arkeologia. Cientificonan tambe lo investiga Aruba su medio ambiente marino. Un tecnica cu lo uza ta di ‘enviromental DNA’, of eDNA, cual ta detecta rastronan di material genetico cu organismonan ta laga atras den awa di lama, manera celula di cuero of fragmentonan di foyo. Esaki ta yuda pa haya un bista mas amplio di e cantidad di especienan presente sin cu tin mester pa captura nan. E combinacion di traha mapa arkeologico y investigacion ecologico ta provee un oportunidad unico pa Aruba compronde su herencia natural y cultural bao awa.
Den e mision aki, profesionalnan Arubiano lo traha directamente cu e team di Inkfish durante e expedicion. Arkeologo di MANA Harold Kelly y ecologo Oriana Wouters di Imagination for Development and the Nature of Values Aruba (IDNOVA) lo participa riba RV Hydra, hayando experiencia practico cu metodo y tecnologianan mientras contribuyendo conocemento local di Aruba y su lama.
