Basta aña pasa tabatin un ministro cu a bin cu e ilustro idea pa laga pueblo paga pa hiba desperdicio na e lugar unda e mester a bay. Nos ta corda e famoso 10 florin cu bo mester a pasa paga na un establecimento comercial, pa despues hiba bo pickup of truck cu sushi na dump di Parkietenbos. Nos no ta defende e actitud iresponsable di hopi ciudadano cu tabata opta pa tira nan carga di desperdicio na cualkier lugar, basta nan no mester a paga pa entrega e carga na e lugar propicio. Pero di otro banda, e fenomeno cu a surgi pronto, di monton di desperdicio den cercania di dump, pero despues tambe riba henter isla. Dentro di poco tempo tur e hanchinan di tera den cercania di dump a keda yen di desperdicio, aparentemente di hende cu a confronta e obligacion di paga e ‘multa’ pa por entrega, y tabata opta pa bira basha e sushi na cualkier lugar. Asina hasta tabatin e caso di un habitante den cercania di dump cu a manece un dia cu cadaver di un porco enorme dilanti di su cas, cu e doño iresponsable aparentemente no por/no kier a entrega na dump. Finalmente a costa basta trabao pa logra regla e peligro grandi aki pa salud publico.

Tur esaki tabata algo perfectamente previsible y por lo tanto di antemano caba un medida totalmente eroneo. Bo no por pone un ‘castigo financiero’ como supuesto estimulo pa e ciudadano cu ta colabora den e proceso di haya e diferente tiponan di desperdicio na e lugar adecua pa nan procesamento. Al contrario, si tabata trata di kier usa e instrumento gubernamental di estimulo financiero, enbes di un castigo lo tabata mas logico pa duna cada ciudadano cu ta trece sushi na e lugar adecua, un estimulo positivo: un suma – modera – pa cada carga cu ta yega na e lugar indica.

Awor, e pakico di henter e relato di pasado aki: nos ta na inicio di un repiticion, un ‘deja vu’ di e situacion di tanto aña pasa. Aparentemente den gobernacion tin un cos cu no ta presente y esey ta capacidad di siña di erornan cometi anteriormente. Mescos cu e situacion describi, den e actual situacion tampoco ta trata di e recoleccion di desperdicio na cas. Esey ta keda na encargo di e empresanan estatal y priva cu ta haci esey. E problema ta sinta atrobe den e diferente tiponan di desperdicio special cu mester bay na un adres specifico. Di banda di e ministerio concerni a pensa cu tabata un bon idea di publica un lista di e empresanan cu a conveni cu nan ta bay ta encarga cu ricibi cierto tipo di desperdicio. Naturalmente tabata prueba di cierto osadia pa yama e simple lista ey un ‘blueprint’ loke segun nos ta totalmente algo otro, pero en todo caso nos no ta bay molestia e lector cu definicion di esey. En todo caso, ta mas cu obvio cu di banda ministerial no a sigui elabora riba e tema di con pa duna acompañamento na publico, con pa atende e asunto di desperdicio aki. Por ehemplo, den un pueblo cu nunca a siña separa desperdicio, bo no por pensa cu bo ta djis publica un par di boletin di prensa y ya, trabao ta cla…

Loke ta bay pasa proximamente, y nos ta haya e promer señalnan cu esaki ta tumando lugar caba, ta cu un persona cu ta haciendo ‘opruiming’ grandi na nan cas o negoshi, no ta bay pensa sistematicamente cual tipo di desperdicio mester bay unda, y seguidamente ta pasa rond ‘bon mucha’ cerca tur e diferente empresanan pa entrega loke ta coresponde na nan. Y mucho menos si e entrega ta bay costa nan placa tambe. Loke e persona ta haci ta busca un lugar un poco aleha di vista di hende y ta benta TUR desperdicio diferente hunto na un lugar: cla ta. Y asina e historia di promer decada di e siglo aki ta ripiti…

Awor, kico ta e situacion: sea na e ministerio, cu tur e conseheronan di peso di e mandatario, toch nan no ta na altura di e historia aki y/o nan no tin conocimento di e materia aki pa anticipa loke ta bay pasa. Bo no mester ta un genio pa deduci cu esaki ta e rumbo cu e asunto lo tuma, mescos cu e conseheronan di e anterior ministro tambe por a anticipa cu si bo mester paga 10 florin pa cada carga, ta den mondi bo ta bay tira cos. Nos ta comprende cu den e situacion cu ta surgi awor, nos lo haya e reaccion cu “ta pesey nos tin City Inspector; e bay parti boet na esnan cu ta viola ley”. Tremendo opcion, nos lo bisa. Acaso nan no ta na altura cu un di e problemanan grave di gobernacion na Aruba ta e incapacidad structural di maneha e tareanan di supervision legal cu gobernacion tin? Hende cu ta benta sushi na mondi no tin custumber di keda para eynan te ora autoridad yega… Den tur e casonan ey ta otro parti di gobernacion mester percura pa di cualkier manera e sushedad ey yega na su destino toch, loke ta costa placa, di comunidad… Ta parce cu, mescos a desplaza e desperdicio di dump bay otro lugar, e otro tipo di desperdicio aki tambe lo keda hiba otro caminda, pero no na esun corecto. Ki dia nos intelectualnan bon paga den gobierno ta siña?