Programa di Bishita Real enfoca ariba cultura y experiencia unico na Aruba

Manera a keda anuncia den nos edicion di ayera, Aruba ta preparando pa ricibi bishita real dia 30 y 31 di januari. Rey Willem Alexander, Reina Maxima y Princes Amalia lo ta bishitando e seis islanan di Caribe Hulandes. Presidente di e comision encarga cu e bishita real a elabora durante un conferencia di prensa ariba e programa di actividadnan durante e bishita di famia real.

E presidente di e comision a remarca primeramente cu henter e programa ta habri pa pueblo yega cerca, para canto di caminda y saluda e bishitantenan real. Pero tin tres momento den e programa cu a crea e oportunidad pa pueblo yega den cantidad grandi saluda nan rey, nan reina y nan princesa heredero.

E momentonan ey ta dilanti Parlamento di Aruba, na San Nicolas y tambe na Bon Bini Festival.

E programa oficial ta cuminsa dialuna 30 di januari. Pa 10:30 di mainta e famia real lo toca suela di Aruba y naturalmente nan no ta biniendo for di Hulanda, nan ta biniendo for di Boneiro caminda e bishita real ta inicia oficialmente.

Na aeropuerto nan lo wordo ricibi cu tur e protocol, cu tur e aspectonan di formalidad pa su Excelencia Gobernador di Aruba, Alfonso Boekhoudt y Prome Minister Evelyn Wever-Croes. Despues di a saluda su excelencia Gobernador di Aruba y Prome Minister, nan lo sali for di aeropuerto direccion pa Wilhelmina Park.

“Nos a pensa cu lo ta bunita pa bay Wilhelmina Park pasobra princesa Wilhelmina ta bisabuela di prinses Amalia. Na Wilhelmina Park lo tin e bishita protocolar oficial cu tur actonan protocolario corespondiente,” el a indica.

Despues di Wilhelmina Park e delegacion lo cana pa e Cas Ceremonial di Gobernador caminda lo tin un encuentro cu Gobernador di Aruba. Despues di esaki nan lo cana riba caminda grandi direccion pa Parlamento di Aruba. Na man drechi lo tin presentacion di un coro hubenil, grupo di baile Pierewietje cu lo deleita e invitadonan cu algun cancion bunita y despues lo topa cu e leerorkest di Aruba.

Na Parlamento di Aruba nan ta wordo ricibi pa presidente di parlamento cu lo compaña e delegacion real den e sala di parlamento y lo presenta nan na e lidernan di e diferente fraccionnan di e partidonan politico.

Despues di esaki e delegacion real lo sali for di Parlamento y lo sigui cana den direccion di Cocolishi na unda secretaria di Ministerraad y Minister President di Aruba lo ricibi nan y lo compaña nan pa e sala di Conseho di Minister situa na di tres piso. Aki nan lo tin un encuentro cu Conseho di Minister y nan lo ricibi informacion tocante desaroyonan, actividadnan y cierto puntonan cu pa Conseho di Minister ta importante pa nan wordo informa di nan.

Despues cu nan a sali for di Cocolishi e delegacion lo bay direccion hotel pa eynan cambia paña, refresca un poco y descansa un poco.

Despues di e salida di hotel, henter e delegacion lo ta bayendo direccion San Nicolas. Prome tin bishita na Filomena College na unda ta bay tin un presentacion di un mural di e heroe di segunda guera mundial, Boy Ecury. Lo tin un presentacion di un obra teatral di e muchanan di scol y lo conta tocante Boy Ecury y kico e ta significa pa Aruba.

Despues lo pasa riba e plaza di misa di San Nicolas pa bay direccion di e Museo Industrial di Aruba. “E Museo industrial pa nos ta importante pa enfatisa e desaroyo economico cu nos pais a conoce desde 1800 y algo. Pa nos ta importante cu semper Aruba a pasa den momentonan dificil, momentonan economicamente dificil, pero semper e pueblo di Aruba ta reconoci pa su resilencia, pa su determinacion y esey awor tambe e pueblo di Aruba ta demostrando. Esey ta algo cu nos kier comparti cu e bishitantenan real,” e presidente di e comision a splica.

Despues di nan bishita na e Museo Industrial di Aruba, e delegacion lo haya un bista di e pinturanan di arte riba muraya cu tin na San Nicolas. A selecta tres pintura en particular cual nan lo observa y lo ricibi splicacion di e diferente pinturanan aki. Nan lo ricibi tambe hopi informacion tocante henter e proyecto riba su mes, e organisacion cu ta na encargo y tambe con importante esakinan ta pa e desaroyo di turismo.

Lo termina finalmente na Nicolaas Store caminda e invitadonan real lo wordo deleita cu un demostracion di cultura. Den e caso aki, el a enfatisa, cu nan a tene na cuenta hopi cu e princesa ta un hoben di 18 aña y nan kier comparti cune algun momento di cultura hubenil.

Durante e demostracion aki lo tin presentacion di street dance, un presentacion arte di palabra y lo termina cu un show di carnaval di mucha pa asina demostra cu e futuro di carnaval ta den bon man.

Despues di bandona Nicolaas Store e bishitantenan lo yega na Marinierskazerne caminda cu nan lo subi riba un boto di Guarda Nos Costa pa bay direccion di hotelnan, pero no sin antes comparti cu nan algun bista interesante di Aruba. Asina e prome dia di bishita real ta yega na su fin.

E di dos dia, diamars 31 di januari, lo cuminsa mas trempan cu un caminata, ‘hike’, den naturalesa di Aruba. Esaki lo cuminsa na Franse Pas na e ruina di mina di oro na unda nan lo haya un bista y informacion, y despues nan lo baha pa mira un neishi di shoco.

Despues di esaki nan lo pasa over pa bay na e pia di sero Jamanota na unda nan lo prepara pa haci un caminata y subi Sero Jamanota pa disfruta di e naturalesa di Aruba. Akinan e bishitantenan ta invitado di Parke Nacional Arikok cu lo brinda guia y informacion.

Despues di e caminata e delegacion ta bay e visitors center di Parke Nacional Arikok y nan lo mira e centro di cultivacion unda cu ta cultivando cierto matanan special pa Aruba y tambe nan lo mira con e proyecto ey ta tumando luga.

Den e Hofi Shoco nan lo topa cu e junior rangers y e directiva di Parke Nacional Arikok, cu lo conta nan di algun proyecto cu nan ta trahando riba dje pa loke ta conservacion di naturalesa, algo hopi importante.

Despues di e bishita na Parke Nacional Arikok, e bishitantenan real lo bishita Aruba Aloe. pa esunnan cu no sa, recientemente Aruba Aloe a ricibi e titulo ‘Koningklijke’. Esaki ta hacie e prome compania pafo di Hulanda cu mag di usa e titulo aki.

“Door cu nan ta cumpli cu tur e rekisitonan, cu no ta facil pa por tin e seyo ey, e corona riba nan logo, naturalmente esey ta duna hopi real na e marca Aruba Aloe pero tambe na pais Aruba.”

Durante e bishita aki e delegacion lo experiencia con e produccion aki ta tuma luga den practica. Nan lo haya splicacion di e personal di Aruba Aloe, en particular e hobennan cu ta traha eynan y nan lo cana den e veldnan di Aloe. Princes Amalia lo corta Aloe y despues nan lo sinta pa traha producto di aloe.

Despues di e bishita na Aruba Aloe, nan lo disfruta di un lunch na Wilhelmina Restaurant y despues nan lo atende Universidad di Aruba caminda lo tin encuentro cu e docente- y studiantenan.

Despues di esaki Rey Willem Alexander y Princes Amalia lo bay direccion Centro Deportivo Frans Figaroa na unda nan lo tin un encuentro cu e mundo di futbol cu e academia di futbol masculino y femenino.

Reina Maximo lo bishita Qredits Aruba, un proyecto di creditonan chikito cu ta un tema hopi cerca di e reina y el lo ricibi informacion di un proyecto enfoca ariba agricultura.

E programa di e bishita real lo termina cu un bishita na Fort Zoutman y esaki lo cuminsa riba Plaza Padu. Nan lo pasa riba full e plaza na unda nan lo topa cu artesano- y artistanan y nan lo mira diferente demostracion, show di baile y lo tin tambe proyeccion di video mapping ariba edificio di Parlamento.

Despues nan lo drenta den Fort Zoutman na unda nan lo presencia un parti di Bon Bini Festival. “Nos ta kere esaki ta algo cu lo duna nan un bon bista di e historia di cultura, musica y baile di nos pais. E anochi lo termina cu un show di carnaval compaña pa brassband cu lo busca nan pa hiba nan poco poco riba e caminda dilanti di gabinete di gobernador despues di a dispidi di pueblo di Aruba y asina finalisa e bishita real na Aruba.