Diasabra ultimo band’i 4or di atardi, a tuma luga e marcha simbolico cu famia y amigonan a haci den nomber di e hoben Venezolano Luisangel Figueroa conoci como “DJ Louisville” ken a muri den circunstancianan cu no a ser aclaria ainda pa autoridadnan.

Cu e frase di “Queremos Justicia” un grupo di personanan a sali for di Plasa Turismo y a bay cana te Parlamento di Aruba pa asina mustra na comunidad cu nan kier haya sa kico a pasa cu e hoben Figueroa e dia 17 di october di aña 2021, dia cu el a perde su bida di manera inespera y den circunstancianan cu no ta conoci.

Anahiza Flores mama di e hoben fayecido a expresa pa diferente medionan di comunicacion presente cu e accion aki tabata algo cu tabata programa for di aña pasa pero te diabierna pasa nan a haya e permiso di polis pa asina por realisa e marcha simbolico, “igualmente nos a haci’e pasobra nos kier recorda Luisangel pa cu asina su caso no lo keda den lachi, nos sa cu autoridadnan ainda no a cera e caso pero nos ta sigui, mi ta pidi boso cu mi kier sa kico a pasa cu mi yiu, mi sa cu tin algun casonan cu otro hende a comenta mi cu no a ser resolvi y mi ta espera cu esey no lo ta e caso di mi yiu”, Flores a sigura.

Manera Bon Dia Aruba a publica den su edicion di diasabra ultimo, Flores a expresa cu nan no tabatin e intencion di entrega ningun manifiesto na parlamento debi cu ya caba nan a papia cu autoridadnan concerni y cu danki na diferente publicacionnan cu a wordo haci riba rednan social Ministerio Publico a tuma contacto cu su persona aunke no tabata pa duna informacion tocante e caso di su yiu, cu awe dialuna ta cumpli 3 luna di su morto sin un clarificacion di con esey a sucede.

Tocante esaki, Flores a indica cu “mi ta bisando e berdad, mi no ta bisando ningun mentira, e par di biaha cu mi a bay Ministerio Publico tabata iniciativa di mi, mi kier pa esey keda claro”.

Ramon Figueroa tata di e hoben Luisangel a expresa cu ta importante pa comunidad sa cu esaki no tabata un manifestacion sino pa cu pueblo di Aruba apoya nan di e mesun forma cu autoridadnan ta apoya nan, pa motibo cu nan kier un pronto solucion pa e caso di su yiu.

Personanan presente a bisti cu pañanan blanco pa asina demostra “e pureza y noblesa di mi yiu” manera Figueroa a comenta, cu e tabata un bon ciudadano.

Na momento cu e grupo di personanan tabata prepara pa sali cana direccion parlamento, funcionarionan di Cuerpo di Polis di Aruba a yega na e luga pa asina duna na nan e indicacion cu nan mester a haci e marcha band’i caminda pa asina no stroba e trafico.

Ora nan a yega na parlamento nan a keda un par di minuut cu nan borchinan cu tabata bisa “Justicia para Luisangel” cu tabatin un unico obhetivo, claridad pa e caso di e hoben DJ di 20 aña cu a muri dia 17 di october na e mall di Paseo Herencia.