Ainda e mester tuma tempo pa procesa tur locual a sucede den ultimo 9 lunanan y particularmente henter e maniobranan cu a culimina cu su retiro. P’esey pa bisa awor aki pa sigui den politica “ta un locura, pasobra locual mi a experiencia ta un “craziness”, si mira tur locual a pasa ultimo lunanan. Si a puntra mi na januari, prome cu mi a sinta, nunca mi a spera cu e cos aki ta bin di e forma aki pa mi.” Esey drs. Marisol Lopez Tromp a bisa Bon Dia Aruba durante un conversacion largo ayera.

A trata tur e temanan cu e Minister a trece dilanti na varios ocasion, pero a bay mas profundo den cada uno, pa asina purba analisa kico realmente a pone Conseho di Minister conclui cu e relacion cu Lopez Tromp ta ‘onwerkbaar’. Y mas ainda, pakico na final, ta partido MEP a expresa asina tanto disgusto contra su persona, mientras cu desde 15 di october, e dos miembronan di fraccion di POR, esta Dellanira Maduro y Allan Howell ta keto y no ta contesta ningun pregunta di prensa.

Pa Lopez Tromp, e contesta riba e pregunta di con e mester a bay, ta cerca su ex-colega di partido, Otmar Oduber, cu te ainda no solamente tin control riba POR, pero ta maneha hopi di e decisionnan di minister di Husticia Andin Bikker y ademas tin sosten di diferente minister di MEP. Y e sosten aki ta relaciona cu e spiritonan na cual Lopez Tromp a referi dia 31 di juli y cu for di e momento ey a keda colga den henter comunidad.

Spiritonan bao contract cu otro minister

Durante su ilustracion na Bon Dia Aruba, Lopez Tromp a splica cu el a topa cu contratonan di persona cu nunca el a mira na buro di minister. “Mi no a bin cu ningun hende, pero mi a topa cu cu e buro di minister di Desaroyo Teritorial, Infrastructura y Medio Ambiente tabata paga hopi hende pa trabao cu nunca mi a mira.” Ta trata di trabaonan entre otro di relacion publico cu nunca e ex-minister a mira. Pa e motibo ey, el a dicidi di stop e contratonan aki. Ta conoci cu mesora for di skina di POR, incluso Andin Bikker a bin protesta na grandi.

Es mas, a bin instruccion di POR cu e mester tuma nan den servicio atrobe. Locual no tabata conoci na Aruba ta, cu e mesun spiritonan aki, algun di nan cu ademas ta traha como miembro di prensa na e momentonan aki, ta cobra tambe for di despacho di otro minister, incluso minister Glenbert Croes y minister Dangui Oduber. E realisacion aki a crea hopi asombro cerca Lopez Tromp kende a bisa cu particularmente durante periodo di crisis di Covid, con toch tabata sigui beneficia algun hende.

Influencia Otmar Oduber

Banda di e contratonan di trabao pa spirito, Otmar Oduber, prome cu a bin e investigacion penal, henter ora tabata yam’e pa puntra con tabata bay cu otorgamento di terenonan. “No tabata trata aki di un tereno pa un persona humilde,no. Aki tabata trata di tereno comercial. Ora cu mi a sinta como minister, mi tabata basta reserva pa firma sin mas.” Segun Lopez Tromp, e tabata kier sa mas detaye prome cu e firma.

Y e proceso di reserva aki y e tempo cu e tabata tuma a crea iritacion. “Corda, e tempo ey, nos no tabata sa di Flamingo. Pero e (Otmar Oduber) tabata altera, rabia y mi ta corda na mei, el a yama mi cerca dje. Andin Bikker tabata ey tambe. Durante e reunion ey, el a reclama mi cu mi tabatin tur cos pega, a puntra mi si mi cabez ta bon pa a inicia e surceance van betaling pa Serlimar.” Como miembro di POR, Marisol Lopez Tromp a bisa cu e tabata trata di splica e situacionnan, cu e tabata trahando riba e diferente proyectonan, pero cu mester a tene cuenta cu Covid, cu situacion a cambia, pasobra banconan ya no tabata duna financiamento pa cierto proyectonan.” Te hasta a bisa Marisol Lopez Tromp cu si e no firma e documentonan, e personanan lo por hib’e Corte.

E culminacion tabata na juni ora cu Andin Bikker a tene un conferencia di prensa unda a anuncia cu POR ta bay saca Marisol Lopez Tromp for di partido. “Despues mi a insisti cu mi no a haci nada robez, cu como tal no tabatin motibo pa saca mi di partido.”

Cu e proceso di mediacion, Lopez Tromp a kere cu e asunto a calma, sigur despues di e reunionnan tumultuoso na juli y augustus. Pero diripiente a bin e asunto di spearfishing unda a exigi cu e mester firma e gedoogbeleid. Marisol Lopez Tromp ta reitera cu e no ta contra pa yuda un grupo specifico di hende cu mester tira pisca pa pone pan riba mesa, pero cu e no por firma sin mas. Como minister responsabel, su tarea ta pa busca conseho di tur su departamentonan y instancianan concerni pa no firma pa loco.

“E ora a bin e otro problema. Prome cu mi a bay Hulanda pa hiba mi yiu, berdad mi a bay Ministerraad. Pero no pa discuti e punto di spearfishing sino pa bay cu un proposicion pa trece cambio den e structura di DIP. Sea ta cambia e structura of hasta ta elimina DIP y crea un instancia nobo pa asina bin cu un limpiesa den e servicio.” No por a discuti e proposicion pasobra mesora su otro coleganan minister a atak’e cu locual e ta haci no ta bon, cu minister Dangui Oduber no kier sigui traha asina mas cune. “Esey tabata nobo pa mi, pasobra nos trabaonan no tabata mishi mucho cu otro.”

Broedende Kip parti II

E culminacion di e confrontacion cu su persona den Conseho di Minister a conduci na mediacion, cu segun Marisol Lopez Tromp tabata mas bien un ‘window dressing.’ Pasobra e persona encarga cu dirigi e mediacion, esta mr. Arie Swaen tabata conseh’e pa entrega su retiro, hasta prome cu e reunionnan di mediacion a cuminza.

“Nan tabata kier pa ami bay. Mi a bisa nan cu ami no ta bay. Mi kier bo splica pakico bo kier pa ami bay, y kico a bay robez. Ora a drenta e reunion di mediacion, mi no a haya ningun pregunta.E mediacion tabata mas bien pro-forma.”

E enfoke e momento ey tabata sinembargo pa hiba su yiu Hulanda. “Ora cu el a nace e tabatin e problema di ‘broedende kip’ y awor cu e mester a bay Hulanda tambe tabatin baina. E tabata dimas.” Lopez Tromp a bisa cu e momento ey cu a manda yam’e pa e reunion, su intencion no tabata pa bolbe, mirando cu e tabata kier a yuda su yiu den e proceso pa establece su mes na Hulanda. “Mi tabata cla pa nan retira mi numa. Ta mi yiu a bisa mi pa mi bolbe Aruba pa defende mi mes. E tabata den Parlamento Hubenil y ta completamente den e pensamento cu mester sigui proceduranan.”

Parlamento no kier sa di problema

Locual Marisol Lopez Tromp a haya yamativo durante e reunion di 31 di juli ta cu e parlamentarionan, incluso parlamentarionan di MEP, tabata hopi insistente pa e tuma su retiro, y no tabata kier a tende di e situacionnan cu e, como Minister, a topa den e diferente departamentonan cu ta resorta bao di su persona.

Prome cu fraccion di MEP a cumpra e guera contra Marisol Lopez Tromp tabatin e caso Flamingo cu a inicia. Y un di e motibonan di e investigacion penal, ta otorgamento di tereno. “Mi tabata sa di Avestruz, pero no di Flamingo. Ela trece henter un otro bista riba kico tur mi a experiencia. Y mi a tuma nota, cu den DIP, den Serlimar, MEP na juni no a profila su mes di kier a baha Marisol Lopez Tromp, pero cu unicamente tabata sostene e fraccion di coalicion POR.

Despues di e reunion di 31 di juli cu no a presenta un mocion di desconfianza, a mustra cu cos lo a calma. Marisol Lopez Tromp a ripara cu asina cu el a cuminza traha back, a bin e topico di spearfishing. “Tabatin problemanan hopi mas grandi cu e asunto di spearfishing. Tin e problema di e edificio nobo di hospital, cuanto placa gobierno ta perde cune, tabatin e perdida di trabao di miles di hende, e problemanan den enseñansa.” Sinembargo, tabata mustra cu gobierno kier a enfoca riba Marisol Lopez Tromp y den su concepto, el a sinti e spirito su tras.

“Ora cu MEP a bula aden, den cuestion di spearfishing, ta lider di fraccion di MEP Rocco Tjon a entrega e mocion di desconfianza. Ami a bisa den parlamento cu mester tin un validez pa un desconfianza asina. E ley pa permiti tiramento di pisca no ta riba mi. E ehecucion di un gedoogbeleid ta pa cuenta di ministernan Bikker y Romero.” Pero e ta convenci cu e mocion tabata un excusa. “Mi mester a bay y a usa e momento ey.”

Pueblo a realisa e wega

Locual a habri wowo di comunidad mas ainda, ta e forma con a pasa e mocion di desconfianza, siguiendo un procedura robez. “Door cu mi tabata tres aña presidente di parlamento, mi sa con e proceso ey mester a bay. No mester a sigui cu e votacion pasobra no tabatin quorum. Y mas ainda, e forma con a vota tabata contra ley.” Pero mas cu e procedura robez, Marisol Lopez Tromp a realisa cu e mester a bira e carne preto “y e no tabatin nada di haci cu spearfishing.” Y pa Lopez Tromp, en realidad no por permiti tiramento di pisca, pasobra e ta contra tratado. Pero mirando periodo di Covid, el a busca conseho pa mira con pa yuda un grupo specifico.

“Mi a puntra Andin Bikker ta di cuanto hende nos ta papia y su contesta tabata ‘miles.’” Y Cris Romero no tabatin un cifra pasobra no tabatin ningun hende registra cu ta tira pisca. “Si tabatin necesidad, lo mester a cuminza registra di hopi tempo caba, manera ami a haci pa terenonan di huur, pa cuminza. Pa colmo, ami ta carga e culpa pa un asunto cu otronan (Bikker) tin mas di 10 aña ta purba logra. Kico a stroba pa introduci e tiramento di pisca tempo cu Otmar Oduber tabata minister? Pakico awor cu ami tey, diripiente ta ami ta want’e?”

E conversacion cu Lopez Tromp tabata amplio y Bon Dia Aruba lo publica mas di esaki den e proximo edicionnan.