Marlon Sneek: ‘Prome minister a gaña pueblo y a manipula su propio fraccion den parlamento’

E lista di promesanan falso haci pa prome minister Evelyn Wever-Croes ta sigui crece y parce cu e tipo di promesanan aki, ta bira algo normal pa e lider di MEP, segun lider di fraccion di AVP, Marlon Sneek ta mustra.

E miembro di fraccion di AVP a mustra cu ya no ta un secreto mas cu prome minister di pais Aruba, ta basa su carera politico riba promesanan falso, y si e tin e curashi di gaña hasta su votadonan cu promesanan haci durante di campaña electoral, ta mas cu claro cu su fraccion tambe ta bira parti di grupo grandi di hende cu Evelyn a ‘misleid’ formalmente.

“No ta  cosnan inventa, pero ta mesun prome minister aki a priminti su votadonan cu su gobierno lo drecha e situacion financiero di e pais sin tuma medida, pero bira masacra cartera di pueblo cu medidanan colosal, sin tuma na consideracion e problemanan serio cu el a ocasiona den asina hopi cas di famia rond Aruba.

Shete minister na luga di nuebe, reduci gasto di personal, cual practicamente ta sigui aumenta tur dia di nombracion den e aparato di gobierno cu ta sigui crece.

El a priminti gasolin mas barata, reduccion di prijs di awa y coriente, aumento di salario minimo, drecha e situacion di pensionadonan, pero ningun di e promesanan aki a bira realidad.

Loke a pasa e siman aki den e propio seno di su gobierno, caminda mester a practicamente baha un miembro di fraccion di MEP for di avion pa asina e reunion riba presupuesto 2019 por tuma luga, ta otro prueba cu prome minister nunca ta cumpli cu su pueblo y ni su propio fraccion den parlamento.

For di luna di october ultimo, a informa tur hende cu reces di parlamento ta inicia dia 21 di december, pues dos luna pasa, y ta e mesun Wever-Croes a bay prensa e mesun tempo ey sigurando pueblo y imponiendo riba su propio fraccionnan, cu presupuesto 2019 mester ta cla pa dia 15 di december.

Sinembargo, manera semper e lider di MEP no a cumpli atrobe, a entrega presupuesto hopi laat y ta mas cu claro cu ya tin hende a haci plan caba, entre otro, su propio miembronan di partido.

Den un lapso di algun dia, sin duna suficiente espacio pa studia y analisa presupuesto y un ley asina impactante manera e reforma fiscal nobo, ta ‘bulldoze’ esaki den parlamento y a spera cu su hendenan den parlamento lo sinta boca cera y acepta tur cos.

E caos cu a surgi diamars ultimo ta producto di e sistema tradicional di prome minister pa nunca papia e berdad di e situacion, y mientras cu por cuestiona e miembro di fraccion di MEP cu a dicidi di sigui cu su plan di vacacion, e problema ta sinta cerca un gobierno cu no sa kico nan ta haci y con nan tin cu dirigi e pais aki.

Sinembargo, no solamente prome minister no ta cumpli cu promesanan cu e ta haci, e ta maluza su propio miembronan di fraccion den parlamento pa haci propaganda politico, cu gastonan di su ministerio a wordo reduci, pero ora cu analisa observacionnan di CFT riba e presupuesto aki, tin un otro storia ta ser treci dilanti.

Con bin ministerio di prome minister ta pronk cu su gastonan di personal a baha considerablemente y ainda CFT ta mustra cu gastonan di “su” gabiente a subi cu mas cu 100 miyon florin den apenas un aña di tempo, sin cu el a haci algo pa para esaki.

Na luga cu su fraccion cuestiona e ponencia aki, nan ta wordo manpula manera un set di payaso pa hunga rol di mansaheronan di bon noticia mientras cu CFT ta papia di un otro situacion cu ta keda responsabel di e prome minister Wever Croes.

Ta ranca 130 miyon for di cartera di pueblo y awor ta pretende di laga su marionetanan bay aproba un ley caminda pueblo ya no por mira cuanto e tin cu paga na aumento abnormal di costo di bida, ora cu nan haci compra.

E forma aki di manipula cu interes di pueblo ta algo cruel caminda prome minister y su gobierno ta insisti pa sconde for di bista di pueblo, tur loke e gobierno aki ta rancando for di nan cartera creando mas miseria y dolor den hopi cas rond nos isla,” lider di fraccion di AVP, sr Marlon Sneek ta mustra.

You May Also Like

Arthur Vallejo no a huramenta pero el a bira e di nuebe minister

Un biaha mas e lider di fraccion di oposicion di AVP, Marlon Sneek a ...

‘Wardando ley di prohibicion di plastic, oxybenzone y styrofoam yega parlamento’

Parlamentario Daphne Lejuez (MEP) Manera conoci, gobierno di Aruba recientemente a anuncia cu entrante ...

Mester bin investigacion profundo riba casonan di corupcion di tereno

Den conferencia di prensa di Partido MEP na comienso di siman, Lider di MEP, ...

Lansamento oficial di partido politico nobo Raiz

  Den e ultimo dos luna, nos por a tuma nota di e partido ...

Tur mucha na Aruba merece oportunidad igual pa ricibi educacion di calidad halto

Diasabra mainta na Hilton Aruba Caribbean Resort & Casino a tuma luga e “Teachers ...

‘MEP kier haci fiesta atrobe cu Lotto pa Deporte’

Den e dianan aki Lotto pa deporte ta hopi den bocanan di parlamentarionan di ...