Martiza Ordoñez: Animal, igual cu hende, tambe ta sufri

Proyecto di United Dogs hunto cu otro diferente instancia a bin hunto cu meta pa sterilisa 400 cacho y pushi. Maritza Ordoñez, dokter di DVG, a splica tocante e accion cu ta tumando luga te cu mañan, dia 21 di september.

Ordoñez ta laga sa cu boluntarionan di Hulanda, Merca y Aruba ta yudando pa tira un bista na cada bario unda cu e problema ‘ta mas severo’. E ta agrega cu tabatin algun bestia cu tin doño, pero pa algun circunstancia of ‘maldad’ na algun momento e animalnan ta wordo tira riba caya.

“Pa nan suerte, e proyecto aki tin meta pa sterilisa mas di 400 cacho. Nos ta tumando contacto cu prome minister pa bin cu un plan, pero no por keda den plan. Nos tin cu ehecuta un ley”, Ordoñez ta expresa.

E ta bisa cu polis tin cu cuminsa controla, pa asina duna boet na hende cu ta tira cacho riba caya, ‘un boet ta loke hende ta haya dolor di dje’. E ta comenta cu ta un tristeza pa mira cu tin cacho y pushi ‘bunita’ cu ta bandona.

Sinembargo, e ta expresa su gratitud na prome minister kende a duna sosten, tambe na departamento di Salubridad Publico y Husticia. “Nos kier ehecuta esaki di diferente manera, no cu cada aña ta bin cu cacho pa sterilisa, pero e cachonan ta wordo tira bek riba caya. Esey tampoco ta un solucion, claro e ta algo pasobra ta un yudansa.”

Ordoñez ta pidi pa persona cu ta interesa pa adopta un pushi of cacho, tin oportunidad te cu mañan, diasabra. Nan ta hiba e bestia sterilisa y cu malesa cura. E ta bisa cu den comunidad, un bario cu 200 cacho por trece malesa ‘scabies’, cual cacho por pega otro cacho, y hasta contamina un persona.

“Na Aruba, tin hende cu tin scabies, mirando e problematica cu tin y cu e malesa ta grave pa salud, nos ta colabora pa soluciona esaki. Doño mester bira mas responsabel cu nan bestia, ta posibel pa manten’e cera den cura, dun’e awa, cuminda y cariño. Si bo no por, e ora ey no tum’e. Animal ta manera un persona, nan tambe ta sufri”, el a splica.

Actualmente ta mira bestia tira afo cu herida, tripa ta sali, cu buraco y flaco cu diferente malesa cu nan por transmiti. Ordoñez a finalisa dunando un palabra di danki na tur boluntario cu a sali di nan curason pa por yuda e proyecto di nan ‘propio saco pa e problematica di cacho cu pushi’.