Por a tuma nota den medionan dokter Jerry Semper ta declara cu si 85% di poblacion di Corsou bay vacuna lo tin carnaval otro aña 2022. Esaki ta inaceptabel. No por ta asina cu un dokter ta bini dilanti, manipulando e pueblo cu si 85 % vacuna lo bay tin carnaval otro aña.
Marvin Martina ta haya esaki un falta serio di respet, pasobra no ta na dokter pa duna di conoce cu si pueblo bay vacuna lo tin carnaval 2022. Pues ta nifica cu si pueblo di Corsou no bay vacuna y e total keda bou di 85% lo no tin fiesta pa pueblo di Corsou. Farandula lo keda morto manera e ta actualmente.
Aki ta mira atrobe cu dokter Semper ta trece un situacion dilanti pa asina gana tur hende pa bay vacuna. No ta aceptabel pa sigui manipula yiu di tera. Fiesta di pueblo ta keda di pueblo i mester ser respeta como patrimonio propio. No por menasa pueblo uzando un tradicion patrimonial propio como arma contra e mesun pueblo.
Si nos ta biba realmente den un pais democratico anto mester respeta tur esunnan cu no kier vacuna pa un of otro motibo.
Mi ta acepta y reconoce cu nos ta den un pandemia mundial. Esaki ta pone cu nos mester hala un break na nos farandula pa asina sali for di e pandemia aki. Pero no ku ta bin papia den un rueda di prensa oficial di gobierno pa manipula un pueblo completo.
Kico lo pasa si 85% vacuna y covid-19 keda reina y bira pio aki na Corsou? Dokter Semper bo tin un contesta riba esaki? Por fabor aplica strategia y metodonan cientifico pa informa, forma y guia pueblo. Manipulacion no ta forma parti di educacion.
