(LaPatilla) – Industria den varios estado Venezolano ta operando na un fraccion di loke e tabata. Estado Aragua ta un di nan, unda mas di mitar di e parquenan industrial ta cera, mientras cu den esunnan habri, tin entre 5 y 25% di industria operando ainda. Esunnan cu ta opera na 25% ta mas tanto di sector di alimento, loke ta logico mirando e poder di compra di e poblacion, cu pa mas di 85% ta usa nan entrada pa cuminda.
Ricardo Clamens, presidente di Fedecamaras na estado Aragua, a declara asina den entrevista pa e programa Marca Pais, agregando cua solicitagobierno anulacion di e schedule di 7+7 (7 dia lockdown y 7 dia pa traha), si e empresanan cumpli cu e protocolnan di bioseguridad.
El a destaca cu e sector comercial e industrial di e estado a keda seriamente afecta pa e extension di e dianan di ‘radicalizacion’ di e lockdown cu gobierno a impone pa motibo di e aumento di cantidad di caso di Covid. Esaki no a permiti cierto fluidez di e operacionnan, reflehando den poco benta cu, di acerdo cu cifra suministra pa Camara di Comercio, tin 30% di localnan den centronan comercial cera, mientras cu den e parti industrial tin un productividad abao y deficiencia den e linea productivo.
Tambe Clamens a subraya cu actualmente empresanan ta funcionando practicamente cu capital propio so, debi na e falta di credito bancario pa e aumento di e ‘encaje legal’, e parti di activo cu banconan mester reserva.“E situacion aki a haci cu hopi empresa ta trahando bao di consignacion, es decir, ta tuma mercancia y si bende nan ta paga e acreedor; di otro manera ta imposible opera,” segun Clamens.
